თავის ტკივილი, კბილის ტკივილი, ალერგია, სეზონური ვირუსები — მოგვწონს თუ არა, ჯანმრთელობის პრობლემები ჩვენი ყოველდღიურობის განუყოფელი ნაწილია. სირთულეების მიუხედავად, ვაცნობიერებთ, რომ ასეთი რამ ნებისმიერ დროს ნებისმიერ ჩვენგანს შეიძლება დაემართოს, ამიტომ ირგვლივმყოფებს ჩვენს მდგომარეობას არ ვუმალავთ და, საჭიროების შემთხვევაში, დახმარების თხოვნითაც მივმართავთ.

წესით, იგივე დამოკიდებულება უნდა გვქონდეს მენტალური ჯანმრთელობის პრობლემების მიმართაც. ამის მიუხედავად, საზოგადოებაში ღრმად ფესვგადგმული სტერეოტიპების გამო ვფიქრობთ, რომ მენტალური ჯანმრთელობის პრობლემების აღიარება სირცხვილია, ანდაც მათ უმნიშვნელოდ მივიჩნევთ. არადა, სრულფასოვანი ცხოვრებისთვის მენტალური კეთილდღეობაც ისეთივე მნიშვნელოვანია, როგორც — ფიზიკური. დასამალი არცერთ შემთხვევაში არაფერია — ორივე მათგანს სჭირდება თანაგრძნობა და სათანადო ყურადღება.

იმის საილუსტრაციოდ, რომ მენტალური ჯანმრთელობის პრობლემებში დასამალი არაფერია, წარმოგიდგენთ, როგორი იქნებოდა ჩვენი ცხოვრება, ფიზიკური ჯანმრთელობის პრობლემებსაც ისე რომ ვმალავდეთ, როგორც მენტალურს:

1. საყვარელ საჭმელს ვერ დავღეჭავდით, რადგან კბილის ტკივილს არ ვაღიარებდით

ცხოვრება გაცილებით მშვენიერია, როცა ჩვენი საყვარელი საჭმლისგან სიამოვნების მიღება შეგვიძლია. სწორედ ამიტომ პირველი, ვინც კბილის ტკივილის დროს გვახსენდება, სტომატოლოგია. სტომატოლოგთან მისვლამდე კი ტკივილის დამალვა ნამდვილად რთულია, რასაც გარშემომყოფებიც ხშირად ამჩნევენ. თუ კბილის ტკივილში უცნაური არაფერია, ანალოგიურად დასამალი არაა დეპრესია, რომელიც ნებისმიერ ჩვენგანს შეიძლება დაემართოს და, კბილების მსგავსად, ყურადღებას საჭიროებს.

2. სირბილს ვერ შევძლებდით, რადგან მოტეხილი ფეხის მკურნალობის ნაცვლად, მის დამალვას შევეცდებოდით

მოტეხილი ფეხის დამალვა აზრადაც არავის მოუვა — გაუსაძლისი ტკივილი მაშინვე გვაიძულებს, ექიმს მივმართოთ, შემდეგ კი თაბაშირში შეხვეული ფეხი დავასვენოთ. მოტეხილობის მსგავსად, დასამალი არც ბიპოლარული აშლილობაა, რომლის სამართავად სპეციალისტთან ვიზიტი და შესაბამისი მკურნალობა თუ თერაპიაა საჭირო.

3. წიგნების კითხვით ვერ დავტკბებოდით, რადგან სათვალის გაკეთებას საჭიროდ არ ჩავთვლიდით

მხედველობის გაუარესება ხშირად იმის მიმანიშნებელია, რომ სათვალე გვჭირდება. ამ პრობლემის დამალვა ჩვენს მხედველობას გააუარესებს და ისეთ სიამოვნებას წაგვართმევს, როგორიც, მაგალითად, წიგნის კითხვაა. სათვალის აუცილებლობის აღიარების მსგავსად, მნიშვნელოვანია გავაანალიზოთ, რომ საჭიროა, მაგალითად, ჩვენს ობსესიურ-კომპულსიურ აშლილობაზე საუბარი, მის შესახებ ცნობიერების ამაღლება და სათანადო მკურნალობა.

4. მეგობრებთან ერთად გასართობად ვერ წავიდოდით, რადგან ექიმს შაკიკის სიმპტომებს არ გავუმხელდით

შაკიკი საკმაოდ შემაწუხებელი პრობლემაა, რომლის სამართავად ექიმთან კონსულტაცია აუცილებელია. ძლიერი თავის ტკივილის ფონზე ხომ ყველაზე მარტივი დავალებები კი არა, გართობა და კარგ ხასიათზე ყოფნაც კი ძალიან რთულია. იგივე შეიძლება ითქვას შფოთვით აშლილობაზე, რომელიც სულიერ სიმშვიდეს გვირღვევს. შფოთვითი აშლილობის დამალვა მის დაძლევაში ვერ დაგვეხმარება — საჭიროა საუბარი ახლობლებთან და შესაბამის სპეციალისტებთან.

5. ვერ ვიმღერებდით, რადგან ატკივებული ყელისთვის წამლის ყიდვას ვერ გავბედავდით

ყელის ტკივილი და ხმის ჩახლეჩა ცხოვრებაში ერთხელ ნებისმიერ ჩვენგანს გამოუცდია. ასეთ დროს ექიმთან კონსულტაციის შემდეგ ყელის აბებს და სხვა საჭირო მედიკამენტებს ვყიდულობთ. თუ ჩვენი სიმპტომები ექიმსა და ფარმაცევტებს დავუმალეთ, წამალს ვერ მივიღებთ და ვეღარც ვიმღერებთ. ანალოგიურად, საჭიროა საუბარი ჩვენს მენტალურ პრობლემებზე — ამ გზით საკუთარ თავთან ერთად დავეხმარებით ყველას, ვინც კი ჯერ კიდევ მენტალური ჯანმრთელობის ირგვლივ არსებული სტერეოტიპების გავლენის ქვეშაა.

მენტალურ ჯანმრთელობაზე ხმამაღლა საუბარს ჩვენი ყოველდღიურობის უკეთესობისკენ შეცვლა შეუძლია. ამ თემაზე საუბრით შეგვიძლია მივიღოთ საჭირო დახმარება, დავეხმაროთ სხვებს და შევიტანოთ წვლილი მენტალური პრობლემების შესახებ არსებული სტერეოტიპების დამსხვრევაში.

ეს კარგად ესმით თიბისი დაზღვევაშიც, რომლის ახალი კამპანია — "დასამალი არაფერია" — მუდმივად შეგვახსენებს, რომ ჩვენი პრობლემების წინაშე მარტო არ ვართ. კამპანიის ფარგლებში ცნობილი ადამიანები თავიანთ მენტალურ მდგომარეობაზე საუბრობენ და ყოველდღიურობაში ჩვენი მენტალური ჯანმრთელობის მნიშვნელობასაც გვახსენებენ.

აღსანიშნავია, რომ თიბისი დაზღვევა პირველია ქართულ ბაზარზე, რომელმაც ჯანმრთელობის დაზღვევას მენტალური ჯანმრთელობის დაფარვა დაამატა და ასევე პირველია რეგიონში, რომელიც თანამშრომლებს მენტალური შვებულებით სარგებლობის შესაძლებლობას სთავაზობს.