1974 წლის შემდეგ, პირველად, დედოფალმა ელიზაბეტ მეორემ პარლამენტში სიტყვით გამოსვლის დროს, სამეფო გვირგვინსა და მანტიაზე უარი თქვა.

ბრიტანული პრესა ამ ფაქტს ფარულ მესიჯად აღიქვამს და ამბობს, რომ ელიზაბეტმა ამ ჟესტით პოლიტიკური განაცხადი გააკეთა და დიდი ბრიტანეთის ევროკავშირიდან გამოსვლის თაობაზე საკუთარი დამოკიდებულება გამოხატა. ამ ფაქტს ისიც ამყარებს, რომ დედოფლის კაბა და ქუდი ევროკავშირის დროშის ფერებში იყო გადაწყვეტილი.

შეგახსენებთ, რომ დიდი ბრიტანეთის და ჩრდილოეთ ირლანდიის გაერთიანებული სამეფოს პრემიერმინისტრმა, ტერეზა მეიმ, რამდენიმე თვის წინ ხელი მოაწერა ევროპის საბჭოსთვის გასაგზავნ წერილს, რომლითაც ფორმალურად დაიწყო ბრიტანეთის ევროკავშირიდან გასვლის პროცესი.