ამის შესახებ იშვიათი დაავადებების საკოორდინაციო საბჭოს წევრმა, ივანე ჩხაიძემ ფორმულასთან ისაუბრა.

რატომ არის მნიშვნელოვანი: აქონდროპლაზია იშვიათი გენეტიკური დაავადებაა, რომელიც ზრდის თანდაყოლილ დარღვევას იწვევს.

  • ამ დიაგნოზის მქონე ბავშვების მშობლები წელიწადზე მეტია, უშედეგოდ ითხოვენ აქონდროპლაზიის სამკურნალო ერთადერთი პრეპარატის, ვოსორიტიდის, შემოტანას, რომლის წლიური დოზაც, დაახლოებით, 200 000 დოლარი ჯდება.
  • ისინი რამდენიმე დღეა, კანცელარიასთან ათენებენ და პროტესტს აგრძელებენ.
  • ჯანდაცვის მინისტრთან მშობლების შეხვედრები უშედეგო აღმოჩნდა, პრემიერმინისტრი კი პროტესტის მონაწილეებთან საუბარზე უარს ამბობს.
  • ვოსორიტიდს აშშ-ის წამლისა და საკვების ადმინისტრაციისა (FDA) და ევროპის წამლის სააგენტოს (EMA) ავტორიზაცია 2021 წელს მიენიჭა, თუმცა მთავრობა ირწმუნება, რომ პრეპარატის უსაფრთხოებაში დასარწმუნებლად მეტი მტკიცებულება სჭირდებათ.

დეტალები: ჩხაიძის თქმით, შემოიტანენ თუ არა საქართველოში ვოსორიტიდს, დამოკიდებული იქნება იმაზე, როგორი იქნება პროტოკოლის დასკვნა და რეკომენდაცია.

  • "რამდენიმე კვირაში ეს პროტოკოლი უნდა იყოს დასრულებული. აქ არ არის ლაპარაკი თვეებზე. [...] თუ დასკვნა და რეკომენდაცია იქნება, რომ ეს პრეპარატი უნდა იყოს გამოყენებული, რა თქმა უნდა, ამის მერე იქნება ჩასატარებელი ის ღონისძიებები, რომლებიც უშუალოდ პრაქტიკულ დანერგვასთან არის დაკავშირებული", — თქვა მან.
  • საკოორდინაციო საბჭოს წევრი ამბობს, რომ პრეპარატის დასანერგად აუცილებელი იქნება მედპერსონალის მომზადებაც.
  • "ამ ინექციებს თავისი წესი აქვს, თავისი მომზადების პირობები აქვს, ტრენინგის, სამედიცინო დაწესებულებების შერჩევის საკითხი და ამ დაავადების მქონე ბავშვების გართულებების არსებობის შემთხვევაში, როგორ უნდა იყოს მომზადებული სამედიცინო სისტემა".