ინფორმაციას ადგილობრივი მედიები და ოფიციალური პირები ავრცელებენ.

რატომ არის მნიშვნელოვანი: რუსები ხარკოვის ოლქში, კუპიანსკის მხარეთმცოდნეობის მუზეუმის შენობას თავს დაესხნენ.

  • დაიღუპა მუზეუმის თანამშრომელი, 10 ადამიანი კი დაშავდა.
  • მაშველები ამბობენ, რომ ნანგრევების ქვეშ 2 მოქალაქეა მოყოლილი და მათ გადარჩენას ცდილობენ.

დეტალები: ხარკოვის რეგიონული სახელმწიფო ადმინისტრაციის ხელმძღვანელი ოლეგ სინეგუბოვის განცხადებით, ოკუპანტებმა კუპიანსკის ცენტრს S-300 რაკეტით შეუტიეს.

  • "ქალაქ ხარკოვზე და რეგიონის დასახლებებზე ახალი სარაკეტო თავდასხმების ალბათობა საკმაოდ მაღალია. ნუ უგულებელყოფთ განგაშს და დარჩით თავშესაფრებში", — ხაზგასმით აღნიშნა სინეგუბოვმა.
  • კუპიანსკის დაბომბვაზე კომენტარი გააკეთა უკრაინის პრეზიდენტმა ვოლოდიმირ ზელენსკიმ: "ტერორისტული ქვეყანა ყველაფერს აკეთებს იმისათვის, რომ ჩვენ მთლიანად გაგვანადგუროს: ჩვენი ისტორია, კულტურა, ჩვენი ხალხი, კლავს უკრაინელებს აბსოლუტურად ბარბაროსული მეთოდებით. ჩვენ არ გვაქვს ამის დავიწყების უფლება ერთი წამითაც კი. ჩვენ გვაქვს უფლება და ვუპასუხებთ".

რუსების შეტევა: დღის განმავლობაში ხარკოვის რეგიონის სულ მცირე 18 დასახლება რუსების ცეცხლის ქვეშ იყო.

  • კერძოდ, მტერმა კუპიანსკის რაიონის სოფელ დვორიჩნას დაარტყა, დაბომბვის დროს დაიღუპა 60 წლის ქალი.
  • რუსების ნაღმმტყორცნების ქვეშ იყო ქალაქი ვოლჩანსკი, ჩუგუევსკის რაიონი — იქ მსხვერპლი და სერიოზული დაზიანებები არ ყოფილა.
  • გარდა ამისა, დონეცკის ოლქში რუსეთის აგრესიის შედეგად ერთ დღეში ორი მშვიდობიანი მოქალაქე დაიღუპა და 13 დაშავდა.
  • სამხედრო ადმინისტრაციის ხელმძღვანელის ინფორმაციით, გორლოვსკის მიმართულებით დაბომბვის შედეგად დაზიანდა სკოლა.
  • დონეცკის მიმართულებით კურახოვსკაიას თემში დაზიანდა სკოლა, 2 სართულიანი შენობა და 15 კერძო სახლი.