რა მოხდა: 11 აპრილის საღამოს სოციალურ ქსელებში გავრცელდა უკრაინელი ტყვის სასტიკი მკვლელობის ამსახველი ვიდეო.

  • კადრებში ჩანს, როგორ ჭრიან, სავარაუდოდ, რუსი სამხედროები უკრაინელ მებრძოლს თავს, შემდეგ კი კამერის წინ დემონსტრაციულად დაატარებენ.

  • ვიდეოში ოკუპანტები ამბობენ, რომ მოჭრილ თავს უკრაინელი სამხედროს მეთაურს გაუგზავნიან.

  • ვიდეოში, რომელშიც დამნაშავე რუსი სამხედროების სახეები ნიღბებითაა დაფარული, ჩანს მწვანე ფოთლები და ბალახი, რაზე დაყრდნობითაც, უკრაინული მედიები ვარაუდობენ, რომ ჩანაწერი გასული წლის ზაფხულშია გადაღებული.

უკრაინის პრეზიდენტი მსოფლიო ლიდერებს სიკვდილით დასჯის ვიდეოზე რეაგირებისკენ მოუწოდებს.

  • "არის რაღაც, რასაც მსოფლიოში ვერავინ დააიგნორებს. რა იოლად კლავენ ეს მხეცები. ეს ვიდეო უნდა ნახოს მსოფლიომ. ეს არის რუსეთის სახე", — ამბობს ზელენსკი.

  • "ეს რა არსებები არიან? მათთვის არ არსებობს შვილი, ძმა, ქმარი, ვიღაცის ბავშვი. ეს არის ვიდეო, სადაც რუსეთი ცდილობს, ნორმად აქციოს ჩვევა, გაანადგუროს ცხოვრება.

  • ეს არ არის უბედური ან ეპიზოდური შემთხვევა. ადრეც ასე იყო, ბუჩაშიც ასე იყო. ათასჯერ. ყველამ უნდა უპასუხოს, ყველა ლიდერმა. არ უნდა დაველოდოთ, რომ დრო გავა და ყველას დაავიწყდება".

კადრებს გამოეხმაურა უკრაინის პრეზიდენტის აპარატის უფროსი, ანდრეი ერმაკიც.

  • "ყველაფერზე იქნება პასუხი და პასუხისმგებლობა", — დაწერა მან Telegram-ზე.

კონტექსტი: სრულმასშტაბიანი ომის დაწყების შემდეგ ტყვედ ჩავარდნილი სამხედროების წამებასა და სიკვდილით დასჯაზე ინფორმაცია აქამდეც არაერთხელ გასაჯაროვდა.

  • უკრაინა და საერთაშორისო ორგანიზაციები რუსეთის მიერ ჩადენილი ომის დანაშაულების ათასობით საქმეს იძიებენ.
  • მარტში სოციალურ ქსელში გავრცელდა ვიდეო, სადაც ჩანს, რომ ოკუპანტებმა უკრაინელი სამხედრო Слава Україні-ს წარმოთქმის გამო ჩაცხრილეს.