ამის შესახებ არასამთავრობო ორგანიზაციებმა საერთო განცხადება გაავრცელეს.

რატომ არის მნიშვნელოვანი: ევროკავშირმა საქართველოს, მოლდოვისა და უკრაინისგან განსხვავებით, კანდიდატი ქვეყნის სტატუსი არ მიანიჭა — მისცა პერსპექტივა და 12-პუნქტიანი გეგმა.

  • 140-ზე მეტი ორგანიზაცია ხელისუფლებას მოუწოდებს, გადახედოს და გააძლიეროს ძალისხმევა ისტორიული შესაძლებლობის მისაღწევად.

დეტალები: ხელმომწერი ორგანიზაციები აცხადებენ, რომ ნებისმიერი ინიციატივა ან ქმედება, რომელიც ევროკავშირის ფასეულობებს დაუპირისპირდება, სტატუსის მიღების საბოტაჟი და კონსტიტუციის საწინააღმდეგო ქმედება იქნება.

  • "სხვადასხვა ინფორმაციით, ევროკომისიამ, შესაძლოა, 2023 წლის ოქტომბერში გასცეს საქართველოსთვის ევროკავშირის წევრობის კანდიდატის სტატუსის მინიჭების რეკომენდაცია, თუ საქართველო მომდევნო პერიოდში გააგრძელებს რეფორმებზე მუშაობას და არ გააუარესებს ქვეყანაში ადამიანის უფლებებისა და დემოკრატიის მდგომარეობას", — ნათქვამია განცხადებაში.
  • მათივე თქმით, სამოქალაქო საზოგადოების ორგანიზაციების საქმიანობის მთავარი მიზანი კანდიდატის სტატუსის მოპოვებისთვის მაქსიმალური ძალისხმევის გაწევა იქნება.
  • "ჩვენ, მთელმა საზოგადოებამ, 2023 წლის ბოლოს სიამაყით უნდა განვაცხადოთ, რომ საქართველო ევროკავშირის წევრობის კანდიდატი ქვეყანაა".