ევროპული საქართველოს ლიდერი გიგი უგულავა კონსტიტუციურ მონარქიის შემოღების იდეას ამორალურს უწოდებს. მისი თქმით, საქართველოს უამრავი სოციალურად დაუცველი ჰყავს და ახლა "წმინდა ოჯახის" შენახვა ქვეყანას ძვირი დაუჯდება:

"10-15 მილიონი დასჭირდება ამ წმინდა ოჯახის შენახვას. როდესაც ამდენი სოციალური დაუცველია, რომლებსაც რაღაც ქულების გამო ართმევენ 50 ლარიან დახმარებას, ასეთ პირობებში, ასეთი მზარდი ხარჯის შემოღება არის ამორალური".

უგულავა აცხადებს, რომ მონარქია მმართველობის წარსული ფორმაა და საქართველო უკვე საპარლამენტო რესპუბლიკაა.

უგულავა მიიჩნევს, რომ ქვეყნის მთავარი პრობლემა დღეს არის ბიძინა ივანიშვილი. ევროპული საქართველოს ლიდერი დასძენს, რომ ის საქართველოს არაფორმალური მმართველია.

უგულავას აზრით, კობახიძეს და ივანიშვილს მარგველაშვილი არ მოსწონთ და მისი ჩანაცვლება მეფით სურთ:

"ამაზე წავლენ და საზოგადოებას არაფერს არ კითხავენ იმის გამო, რომ კობახიძეს და ივანიშვილს არ მოსწონთ დღევანდელი პრეზიდენტი და ჯირყვნიან ამ პრეზიდენტს. ახლა საერთოდ მეფით ჩანაცვლებაზე ლაპარაკობენ, ეს უკვე აბსურდის თეატრიც აღარ არის".

ილია მეორემ, გუშინ, 18 ივნისს ქადაგებაში საქართველოში მონარქიის აღდგენის საკითხზე ისაუბრა, რის შემდეგაც მას ამ თემაზე სასაუბროდ ირაკლი კობახიძე შეხვდა.

"საქართველო არის უძველესი ქვეყანა, უძველესი კულტურით. იქნებ გვეფიქრა იმაზე, თუ ვინ ვიყავით წარსულში, ვინ ვართ დღეს და ხვალ ვინ ვიქნებით. იქნებ გვეფიქრა იმაზე, რომ საქართველო არის უძველესი მონარქიული ქვეყანა. მას მეფე მართავდა და დღესაც ხშირი შემთხვევაა მსოფლიოში, როცა მონარქი მეფობს, მაგრამ არ მართავს. ამას ეწოდება კონსტიტუციური მონარქია და მას სიმშვიდე შემოაქვს ქვეყნაში. ეს, რა თქმა უნდა, დღეს და ხვალ ვერ მოხდება," - თქვა ილია მეორემ.