საქართველოს პარლამენტის წევრი ქართული ოცნებიდან, ეკა ბესელია მიიჩნევს, რომ საქართველოს მართლმადიდებელი ეკლესიის პატრიარქის, ილია მეორეს იდეა, მონარქიის აღდგენასთან დაკავშირებით, "განსჯას, დაფიქრებასა და გაანალიზებას" იმსახურებს.

"თუ შევხედავთ ქვეყნებს, რომელსაც ძლიერი დემოკრატია აქვთ და ამავდროულად აქვთ მონარქის ინსტიტუტიც, როგორია იქ პოლიტიკური ბალანსი, წონასწორობა და როგორი შემაკავებელი ფაქტორის მატარებელია მონარქის ინსტიტუტი, ამ პრიზმაში ამაზე მსჯელობა ბუნებრივია ღირს," - აღნიშნა ეკა ბესელიამ.

ილია მეორემ, გუშინ, 18 ივნისს ქადაგებაში საქართველოში მონარქიის აღდგენის საკითხზე ისაუბრა.

"საქართველო არის უძველესი ქვეყანა, უძველესი კულტურით. იქნებ გვეფიქრა იმაზე, თუ ვინ ვიყავით წარსულში, ვინ ვართ დღეს და ხვალ ვინ ვიქნებით. იქნებ გვეფიქრა იმაზე, რომ საქართველო არის უძველესი მონარქიული ქვეყანა. მას მეფე მართავდა და დღესაც ხშირი შემთხვევაა მსოფლიოში, როცა მონარქი მეფობს, მაგრამ არ მართავს. ამას ეწოდება კონსტიტუციური მონარქია და მას სიმშვიდე შემოაქვს ქვეყნაში. ეს, რა თქმა უნდა, დღეს და ხვალ ვერ მოხდება," - თქვა ილია მეორემ.