ბიძინა ივანიშვილის წარმომადგენელი გიორგი უძილაური ფესიბუკზე წერს, რომ ტაბულამ და რუსთავი 2-მა ივანიშვილის მიერ შეთავაზებულ ინტერვიუს ფორმატზე უარი თქვეს, რის გამოც, ყოფილი პრემიერი ჟურნალისტებს "სხვა ფორმატით" უპასუხებს:

"მოკლედ, ივანიშვილის შეთავაზებაზე, შემდგარიყო მისი შეხვედრა რუსთავი 2-თან და ტაბულასთან და საუბარი პირდაპირი ეთერით გადაცემულიყო, რუსთავი 2-ის ხელმძღვანელობამ უარი თქვა. ტაბულამ გამოთქვა მზადყოფნა შეხვედრისთვის ნეიტრალურ ტერიტორიაზე, ფორმატით: მხოლოდ ტაბულა და ივანიშვილი. ამის შემდეგ ტაბულას მიეცა ახალი შეთავაზება, სხვა ტელეარხის, ან ტელეარხების წარმომადგენლებთან ერთად მომხდარიყო შეხვედრა ივანიშვილთან. თუმცა, ეს შეთავაზებაც უარყოფილ იქნა, რადგან ისინი თანახმა იყვნენ მხოლოდ "მსგავსი სარედაქციო პოლიტიკის" მქონე არხთან ერთად შეხვედროდნენ ყოფილ პრემიერს. ასეთ არხად კი ტაბულა მხოლოდ რუსთავი 2-ს მიიჩნევს.

მოკლედ, ორი შეთავაზება უარყოფილ იქნა. საზოგადოებისთვის საინტერესო იქნებოდა ამ ორი არხის წარმომადგენელთა და ივანიშილის შეხვედრა.არ უნდათ, ნუ უნდათ".

ტელეკომპანია რუსთავი 2-ისა და ტაბულას დირექტორებმა რამდენიმე დღის წინ მიღებულ შემოთავაზებაზე ნამდვილად განაცხადეს უარი. ნიკა გვარამიამ ივანიშვილს რუსთავი 2-ის სტუდიაში მისვლა და ტელეარხის ჟურნალისტებთან პირისპირ ინტერვიუ, ყოველგვარი მოდერატორის გარეშე შესთავაზა. ივანიშვილის პირობა კი გულისხმობდა ინტერვიუს მოდერატორთან ერთად "ნეიტრალურ ტერიტორიაზე".