ირაკლი ღარიბაშვილმა მთავრობის სხდომაზე დაკავებულ ლაზარე გრიგორიადისზე ისაუბრა და თქვა, რომ ის ანარქისტია.

რატომ არის მნიშვნელოვანი: რუსული კანონის საწინააღმდეგო აქციის მონაწილე, 21 წლის აქტივისტი პოლიციამ 29 მარტს დააკავა, 31 მარტს კი სასამართლომ პატიმრობა შეუფარდა.

  • გამოძიების ვერსიით, გრიგორიადისმა პოლიციის თანამშრომლებს ქვები და ე.წ. მოლოტოვის კოქტეილები ესროლა, ასევე, ცეცხლი წაუკიდა შსს-ის კუთვნილ ავტომობილს.
  • დაკავების შემდეგ მის წინააღმდეგ ქართულმა ოცნებამ მადესკრედიტირებელი და პროპაგანდისტული კამპანია წამოიწყო.
  • მმართველი გუნდის თავმჯდომარემ გრიგორიადისს "გზას აცდენილი კაცი" უწოდა და თქვა, რომ "ჩანს, ყველანაირი ორიენტაცია არეული აქვს" — კობახიძის ამ განცხადებას, სავარაუდოდ, ჰომოფობიური ქვეტექსტი ჰქონდა.
  • სახალხო დამცველის, ლევან იოსელიანის თქმით, საკუთარი მანდატის ფარგლებში ომბუდსმენის აპარატი აკეთებს ყველაფერს, რათა გრიგორიადისის უფლებები იყოს უზრუნველყოფილი.
  • კობახიძეზე დასმული კითხვის პასუხად, თქვა, რომ ნებისმიერი განცხადება, ორიენტაციაზე, მიუღებელია.

ღარიბაშვილმა არაერთხელ გაიმეორა, რომ "ანარქისტებს ქვეყანაში დესტაბილიზაცია უნდოდათ".

  • "რამდენიმე დღის წინ პოლიციამ დააკავა პოლიციაზე თავდამსხმელი — გახსოვთ, ყველამ ნახა კადრები, ერთ-ერთმა ანარქისტმა როგორ ესროლა პოლიციას მოლოტოვის კოქტეილი";
  • "ანუ, ამ ადამიანს განზრახული ჰქონდა პოლიციელის ცოცხლად დაწვა. მე გამოვედი და ვთქვი ჩემი პოლიცია - ამას არავის არ ვაპატიებთ. ეს არის მიუღებელი, წითელი ხაზი, რომელზეც ჩვენ ვიქნებით უკომპრომისო".

გარდა ამისა, ის მაგალითის მოყვანას შეეცადა და გაიხსენა აშშ-ის კაპიტოლიუმში შეჭრა.

  • "ადგილზე მოკლეს 4 ადამიანი, რომლებიც შეიჭრნენ კონგრესის შენობაში, ჩვენთან თურმე ნორმაა, რომ ეს ანარქისტები შეგვეშვა პარლამენტის შენობაში, თურმე ნორმაა, რომ ცეცხლი გაუხსნან პოლიციას მოლოტოვის კოქტეილებით და პოლიციამ არ უნდა იმოქმედოს, არ უნდა დავიჭიროთ არავინ, არავინ არ უნდა დავსაჯოთ და ამ ანარქისტებს და ქაოსის დამთესველებს, ქვეყნის მტრებს მივცეთ საშუალება, რომ ქვეყანაში შემოიტანონ არეულობა. ამას ჩვენ არ ვიზამთ";
  • "როცა საქმე ეხება უსაფრთხოებას, სტაბილურობას, მანდ უკომპრომისო ბრძოლა მიდის, ჩვენ ასე სუფთად ჩაატარა პოლიციამ ღონისძიება, არავინ არ დაშავებულა რეალურად, მაქსიმალური სიფრთხილით მოვეკიდეთ";
  • "დღეს გვეუბნებიან, რომ მოლოტოვის კოქტეილს რომ ისვრის ვიღაც ანარქისტი, ქვებს რომ უშენენ პოლიციას, თურმე ამაზე უნდა დავხუჭოთ თვალი, ეს რა თქმა უნდა, არ მოხდება და კიდევ ვიმეორებ, კანონი აღსრულდება ყველას მიმართ და ჩვენ არავის უსამართლოდ არ დავსჯით, არ დაგვისჯია და არც არავინ არ დაისჯება", — ამბობს პრემიერმინისტრი.