ამის შესახებ ჯანდაცვის სამინისტრომ განცხადება გაავრცელა.

რატომ არის მნიშვნელოვანი: აქონდროპლაზია იშვიათი გენეტიკური დაავადებაა, რომელიც ზრდის თანდაყოლილ დარღვევას იწვევს.

  • არაოფიციალური მონაცემებით, საქართველოში ამ დიაგნოზით — 16 ბავშვი, მსოფლიოში კი 250 000 ადამიანი ცხოვრობს.
  • აქონდროპლაზიის მქონე ბავშვების მშობლები წელიწადზე მეტია, უშედეგოდ ითხოვენ მათი შვილებისთვის სასიცოცხლოდ მნიშვნელოვანი წამლის შემოტანას, რომლის წლიური დოზაც 200 000 დოლარი ჯდება.

დეტალები: ჯანდაცვის სამინისტროში განმარტავენ, რომ იშვიათი დაავადებების საკითხებზე მომუშავე საკოორდინაციო საბჭოს სხდომაზე გადაწყდა, იმუშაონ აქონდროპლაზიის მართვის პროტოკოლზე.

  • უწყება კვლავ ირწმუნება, რომ პრეპარატი ვოსორიტიდი, რომლის შემოტანასაც მშობლები ითხოვენ, დანერგვის ადრეულ ეტაპს გადის და მასზე მწირი ინფორმაცია მოიპოვება.
  • "საერთაშორისო პრაქტიკის გათვალისწინებით, აქონდროპლაზიის მართვის პროტოკოლზე მომუშავე მულტიდისციპლინური ჯგუფი, პაციენტის ჯანმრთელობის საუკეთესო ინტერესებიდან გამომდინარე, იმუშავებს აღნიშნული პრეპარატის დანერგვის მართლზომიერებასა და იმ ჯგუფების შერჩევაზე, ვისთვის წამლის მიღება პრიორიტეტული იქნება", — ნათქვამია განცხადებაში.