რა მოხდა სხდომათა დარბაზში: პარლამენტში სიტყვით გამოსვლისას პრემიერმინისტრმა გუბაზ სანიკიძეს შეურაცხყოფა მიაყენა, "არაკაცი", "სულგაყიდული" და "მოღალატე" უწოდა და აღნიშნა, რომ ის 10 000 დოლარად მიეყიდა სააკაშვილს.

• "მტყუანის დედას შე**ცი" — შეაგინა მას გუბაზ ზანიკიძემ.
• ამას სხდომათა დარბაზში ხმაური და კამათი მოჰყვა, თუმცა მხოლოდ ღარიბაშვილის მიკროფონი იყო ჩართული და რთულია იმის თქმა, რა ხდებოდა დეპუტატების სკამებთან.
• TV პირველის გავრცელებულ კადრებში ჩანს, რომ ქართული ოცნების დეპუტატი, ალუდა ღუდუშაურიც შეურაცხყოფას აყენებს გუბაზ სანიკიძეს და "ნაძირალას", "მაიმუნს", "ფარჩაკს" უწოდებს.

რა მოხდა პარლამენტის გასასვლელში: ამ ინციდენტიდან მალევე ირაკლი ღარიბაშვილმა გამოსვლა დაასრულა, დარბაზი დატოვა და 5-წუთიანი შესვენება გამოცხადდა.

• სხდომის აღდგენის შემდეგ, დეპუტატმა თეონა აქუბარდიამ განაცხადა, რომ დეპუტატზე ფიზიკურად იძალადეს: "პრემიერმინისტრმა, როგორც ჩვევია ხოლმე, დაგეშა ხალხი უკვე ჩვენს კოლეგაზე, არამხოლოდ ჩვენს მოსახლეობაზე და იყო ფიზიკური შეურაცხყოფა. ეს კიდევ ერთი დასტურია, რომ ერთადერთი ძალა ქართულ ოცნებას აქვს მხოლოდ და მხოლოდ ეს — სიძულვილი გამოიყენოს, ყველა იმ ადამიანის მიმართ, ვინც მას არ ეთანხმება".
• TV პირველმა პარლამენტის ფოიეში გადაღებული კადრებიც გაავრცელა, სადაც ჩანს, რომ დეპუტატები ხმაურით ჩარბიან კიბეებზე, გასასვლელთან კი გუბაზ სანიკიძეს, ხელს ურტყამენ — სავარაუდოდ, შოთა ხაბარელი.
• ამის შემდეგ მას ერთ-ერთი პირი, რომლის იდენტიფიცირება კადრიდან რთულია, ქეჩოში კიდებს ხელს, ყვირის "დავი ახლა აქედან" და კარებში გაგდებას ცდილობს.
• ამ დროს ქართული ოცნების კიდევ ერთი დეპუტატი, დავით მათიკაშვილი მას აგინებს: "ნაბი*ვარო, შენ მოგი**ნავ დედის მუ**ლს".

რატომ არის მნიშვნელოვანი: ღარიბაშვილი საკანონმდებლო ორგანოში ქვეყნის უსაფრთხოების გამოწვევებზე სასაუბროდ მივიდა.

• მიუხედავად იმისა, რომ გამოსვლამდე დეპუტატმა, თეონა აქუბარდიამ მოუწოდა მას, ესაუბრა რეალურ საფრთხეებზე და არა პროპაგანდისტულ ნარატივებზე, ის ასე არ მოქცეულა.
• ტრადიციული რიტორიკისგან განსხვავებით, პრემიერმინისტრი ახსენებდა რუსეთს, მაგრამ არა როგორც ქვეყანას, რომლისგანაც პირდაპირი საფრთხე მოდის — უფრო მეტ დროს ის უკრაინისა და ოპოზიციისგან მომავალ "საფრთხეებზე" საუბარს უთმობდა.
• მის ჩამონათვალში ომში ჩათრევის მცდელობებსა და სარფთხისშემეცველ 4 პროცესში მოხვდა სააკაშვილის ჩამოსვლა, უკრაინაში წამსვლელი მოხალისე მებრძოლებისთვის გაფრენის უფლების განხილვა, აქციები #შინევროპისკენ და 8-9 მარტს რუსული კანონის საწინააღმდეგო პროტესტი.
• პრემიერმინისტრმა სცადა, რომ ეს აქციები ძალადობრივად და მთავრობის გადატრიალების გეგმად წარმოეჩინა.
• ამავე ტრიბუნიდან, სადაც პოლარიზაციაში ევროპას და ოპოზიციას დასდო ბრალი, ღარიბაშვილმა ოპოზიციას ისევ უწოდა დესტრუქციული, რუსული კანონის საწინააღმდეგო აქციის მონაწილეებს კი ძალადობრივი და ანარქისტული.
• ღარიბაშვილს სამოქალაქო საზოგადოებამ არაერთგზის განუმარტა და მოუწოდა არ გამოიყენოს სიძულვილის ენის შემცველი რიტორიკა და არ წაახალისოს პოლარიზაცია და აგრესია ოპონენტების, მედიის და აქტივისტების მიმართ.