საქართველოს საფეხბურთო ნაკრები 2023 წელს ბათუმში მონღოლეთთან ამხანაგური მატჩით გახსნის. შეხვედრა 25 მარტს, 18:00 საათზე გაიმართება.

აღსანიშნავია, რომ საქართველოს ნაკრები მონღოლეთს პირველად ხვდება. მატჩი ერთგვარი მოთელვაა კიდევ უფრო დიდი საფეხბურთო ზეიმის წინ, რომელიც 28 მარტს შედგება. მარტის მეორე მატჩს საქართველოს ნაკრები კვლავ ბათუმში, ევროპის ჩემპიონატის საკვალიფიკაციო ეტაპის ფარგლებში, ნორვეგიასთან გამართავს.

საქართველოს ნაკრები მონღოლეთთან თამაშის წინ სრული შემადგენლობით უკვე შეიკრიბა. საგულისხმოა, რომ მონღოლეთის ნაკრებმა 2022 წელს 5 შეხვედრა ჩაატარა და აქედან სამი ერთნაირი ანგარიშით — 0:1 წააგო ლაოსთან, პალესტინასთან და ფილიპინებთან. მონღოლებმა 0:0 ითამაშეს ბანგლადეშთან და 2022 წელს თავიანთი უკანასკნელი შეხვედრა 2:0 მოუგეს იემენს, ეს მატჩი ივნისში გაიმართა და ამის შემდეგ მონღოლეთის ნაკრებს არ უთამაშია. საქართველოს ბოლო მატჩი კი ნოემბერში მაროკოსთან ამხანაგური დაპირისპირება იყო, რომელიც 0:3 დავთმეთ. იქამდე ჩატარებული 8 მატჩიდან კი საქართველომ 6 თამაში მოიგო და ორი ფრედ დაასრულა. სანიოლის გუნდმა ერთა ლიგის ჯგუფი მოიგო, რანგით ზედა ლიგაში, B დივიზიონში აინაცვლა და ერთ წლის შემდეგ პლეი ოფიც ელოდება, სადაც ევროპის ჩემპიონატის ფინალური ეტაპის საგზურის მოპოვება ასევე შესაძლებელია.

ამჯერად კი, მონღოლეთთან თამაშის წინ ვილი სანიოლს რამდენიმე პოზიციაზე გადაწყვეტილება აქვს მისაღები. გარდა ამისა, შესაძლოა, რამდენიმე სათადარიგო გეგმაც დაიტესტოს. აღსანიშნავია, რომ ნაკრების განკარგულებაში ერთდროულად არიან ვარსკვლავები — ხვიჩა კვარაცხელია და გიორგი ჩაკვეტაძე.

მიუხედავად იმისა, რომ მატჩი ამხანაგურია, მაყურებლის მხარდაჭერა აუცილებელია. სწორედ ამიტომ, ფეხბურთელების მხარდასაჭერად და ქომაგების კიდევ უფრო გასამხნევებლად საქართველოს ბანკმა, საქართველოს ეროვნული საფეხბურთო ნაკრების მთავარმა სპონსორმა, ახალი ვიდეორგოლი მოამზადა.

საქართველოში დიდი ფეხბურთი ბრუნდება! უყურე ვიდეოს და უგულშემატკივრე საქართველოს ნაკრებს.