საქართველოს ფინანსთა სამინისტროს საგამოძიებო სამსახურმა საბაჟო წესის დარღვევით 1 394 გრამი ოქროს გადმოტანის ბრალდებით აზერბაიჯანის ორი მოქალაქე დააკავეს. ინფორმაცია ამის შესახებ უწყების პრესსამსახური ავრცელებს.

საქართველოს ფინანსთა სამინისტროს საგამოძიებო სამსახურში აღნიშნავენ, რომ ნივთების საბაჟო ღირებულება 676 337 ლარია.

საქმეზე გამოძიება საქართველოს სისხლის სამართლის კოდექსის 214-ე მუხლის მეორე ნაწილით მიმდინარეობს. ამ მუხლით, საქართველოს საბაჟო საზღვარზე, კონტროლის გვერდის ავლით, განსაკუთრებით დიდი ოდენობით მოძრავი ნივთის გადმოტანა ისჯება ხუთიდან შვიდ წლამდე პატიმრობით.