ამის შესახებ კობახიძემ ჟურნალისტებთან ისაუბრა.

რატომ არის მნიშვნელოვანი: ირაკლი ღარიბაშვილის განცხადებებს ფრანკლინის კლუბის შესახებ ამჯერად ქართული ოცნების თავმჯდომარე შეუერთდა და სტუდენტები ახალგაზრდულ ექსტრემისტულ დაჯგუფებად მოიხსენია.

• პრემიერმინისტრმა იმედის ეთერში რუსული კანონის საპროტესტო აქციაზე საუბრისას ფრანკლინის კლუბს ანარქისტები უწოდა და თქვა, თითქოს, ახალგაზრდებს "რაღაც სატანისტების ფორმები ეცვათ".
• კობახიძე გვიმტკიცებს, რომ ქართულმა ოცნებამ ექსტრემისტული დაჯგუფებები "გაშიფრა", რომელთა ორგანიზებითაც იყო, ვითომ და, ძალადობრივი ქმედებები სახელმწიფოს წინააღმდეგ.
• ქართული ოცნების თავმჯდომარემ საუბრისას ფრანკლინის კლუბს, რომელსაც სტუდენტებში საგანმანათლებლო ფუნქცია აქვს, უცხოური გავლენის აგენტი უწოდა.

დეტალები: კობახიძის თქმით, ნაციონალურ მოძრაობასთან, გირჩი — მეტი თავისუფლებასთან, სირცხვილია და დროასთან ერთად გასულ კვირაში გამოიკვეთა ფრანკლინის კლუბის აქტიურობა.

• "ფრანკლინის კლუბი არის უცხოური გავლენის აგენტი, რომელიც ასეულობით ათასი ლარით ფინანსდება. რისი მხარდამჭერიცაა ამერიკული ორგანიზაცია ატლას ნეთვორქი, რომელიც წარსულში არაძალადობრივ და ძალადობრივ პროტესტს აორგანიზებდა არა ერთ ქვეყანაში, ასევე აქტიურად მუშაობდა ბრექსითზე", — თქვა კობახიძემ.
• მან კლუბი დაადანაშაულა, თითქოს პოლიტიკური აქტივიზმისთვის სტუდენტებისა და სკოლის მოსწავლეების რეკრუტირებას ახორციელებს.
• "სტუდენტების მობილიზაცია ხდება ორი უნივერსიტეტის ბაზაზე. ესაა კახა ბენდუქიძის თავის დროზე ერთ ლარად მითვისებული თავისუფალი უნივერსიტეტი და გიული ალასანიას მიერ ასევე ერთ ლარად მითვისებული საქართველოს უნივერსიტეტი", — განაცხადა კობახიძემ.
• ქართული ოცნების თავმჯდომარემ თქვა, რომ თითქოს ფრანკლინის კლუბში ლიბერალური ფაშიზმის იდეოლოგიაა და უნდა, რომ სტუდენტების მშობლების ყურადღება ამაზე გაამახვილებინოს.

გარდა ამისა, კობახიძემ განაცხადა, რომ კლუბში ტრენინგებს ატარებენ ოპოზიციის ექსტრემისტი ლიდერები, რომლებიც მსმენელებს რევოლუციურ გეგმებზე დაუფარავად ესაუბრებიან.

• ამბობს, რომ ტრენინგებს ატარებენ ზურაბ ჯაფარიძე, გიორგი მშვენიერაძე, გიორგი მელაძე და ოპოზიციის სხვა ექსტრემისტი ლიდერები, რომლებიც მსმენელებს რევოლუციურ გეგმებზე დაუფარავად ესაუბრებიან.
• ლექტორი მელაძე კობახიძეს პასუხობს, რომ "განახევრებული" და "დაუსრულებელია".
• "მელაძე ექსტრემისტი ლექტორიაო, უთქვამს დაუსრულებელ კობახიძეს. ექსტრემისტი მამაშენია, შე განახევრებულო!", — წერს გიორგი მელაძე.

ფრანკლინის კლუბი სოციალურ ქსელში ბრალდებების წინააღმდეგ განცხადებას ავრცელებს და იმედს მოუწოდებს, ღარიბაშვილის ბრალდებებზე საპასუხოდ, ღია ეთერში მიიწვიოს.

• მათი განცხადებით, იმედის ეთერში არაერთხელ გავიდა დეზინფორმაცია მათ შესახებ, რაც 12 მარტს, ირაკლი ჩიხლაძის გადაცემაში ღარიბაშვილის აბსურდული განცხადებებით დაგვირგვინდა.
• "ეს დეზინფორმაცია აშკარად ატარებს აგრესიულ, შავრაზმულ ხასიათს და ემსახურება ფრანკლინის კლუბისგან მტრის ხატის შექმნას", — აცხადებენ ისინი.