ევროპარლამენტის ექვსმა პოლიტიკურმა ჯგუფმა საერთო რეზოლუცია შეადგინეს აფგან მუხტარლის საქმეზე, სადაც აზერბაიჯანს დაკავებული ჟურნალისტის გათავისუფლებისკენ, საქართველოს კი გამჭვირვალე გამოძიებისკენ მოუწოდებენ. სტრასბურგში ევროპარლამენტის პლენარულ სესიაზე, აფგან მუხტარლის საქმე და აზერბაიჯანში, მედიაში არსებული მდგომარეობა დღეს, 15 ივნისს განიხილეს.

პეტრას აუსტრევიჩუსის განცხადებით, მუხტარლის საქმის გამოძიებაში, ბაქო და თბილისი უნდა იყვნენ პარტნიორები:

"გამოძიება უნდა იყოს გამჭვირვალე და ჩვენ ყველამ უნდა მივიღოთ მეტი ინფორმაცია, სხვა შემთხვევაში ჩვენი პარტნორობის საკითხი ეჭვქვეშ დადგება".

ევროპარლამენტარების ნაწილმა განაცხადა, რომ ამ საკითხის გადადება არ შეიძლება და ევროკავშირმა არ უნდა დაუშვას მსგავსი პრეცედენტი აღმოსავლეთ პარტნიორობის ქვეყნებში. მათმა ნაწილმა კი თქვა, რომ უმჯობესია ჯერ მეტი ინფორმაცია გავრცელდეს ამ საქმეზე და სწორედ ამის შემდეგ მიიღონ რეზოლუცია.

პარასკევს, 16 ივნისს ევროკომისარი იოჰანეს ჰანი ბაქოს ეწვევა, სადაც პრეზიდენტ ილჰამ ალიევს შეხვდება. ამაზე, ევროპარლამენტის წევრმა რებეკა ჰარმსა თქვა, რომ მისი ვიზიტი მუხტარლის საქმეს მეტად აქტუალურს გახდის.

ევროპარლამენტარების ნაწილმა განაცხადა, რომ აფგან მუხტარლი დაუყოვნებლოვ უნდა გათავისუფლდეს და ბრალდებები მოეხსნას, ხოლო ეს საქმე, საქართველოს რეპუტაციის სერიოზული დაცემა იქნება.

ევროპის სახალხო პარტიის მიერ აზერბაიჯანელი ჟურნალისტის, აფგან მუხთარლის შესახებ მომზადებული რეზოლუციის პროექტში ნათქვამია, რომ თუკი საქართველოს ჩართულობა დადასტურდება, ეს იქნება საქართველო-ევროკავშირის ასოცირების შეთანხმების, ევროპული ღირებულებებისა და პრინციპების უხეში დარღვევა, რაც მკვეთრად დააზიანებს საქართველოს, როგორც ქვეყნის რეპუტაციასა და სანდოოობას.

ევროპარლამენტი საქართველოს ახსენებს ევროკონვენციის მე-3 მუხლს, სადაც წერია, რომ ქვეყანა ვალდებულია არ გადასცეს სხვა ქვეყანას ის პირი, რომელსაც შესაძლოა ემუქრებოდეს წამება, არაადამიანური ან დამამცირებელი მოპყრობა.

ევროპარლამენტი მტკიცედ მოუწოდებს აზერბაიჯანს პატივი სცეს მედიის თავისუფლებას, და საერთაშორისო სტანდარტების შესაბამისად დაიცვას გამოხატვის თავისუფლება და დაასრულოს მთავრობის კრიტიკის ცენზურა, მედიასაშუალებებში.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს, რასაც საქართველოს ხელისუფლება უარყოფს. შსს ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.