წარწერები, რომლებიც აქციის მონაწილეთა სახლებთან გაჩნდა, შემდეგი შინაარსის იყო: "აქ ცხოვრობს დავალებების შემსრულებელი ნაცჯაშუში".

რატომ არის მნიშვნელოვანი: 7 მარტიდან, საქართველოს ქალაქებში რუსული კანონის საწინააღმდეგო დემონსტრაციები იმართება.

  • აქციას უერთდება ყველა საზოგადოებრივი სექტორის წარმომადგენელი, მათ შორის — მედიები და არასამთავრობო ორგანიზაციები, რომლებიც კრემლის გავლენით შთაგონებული კანონის პირდაპირი სამიზნეები არიან.
  • ქუთაისში რუსული კანონის წინააღმდეგ საპროტესტო აქციების ერთ-ერთი ხელმძღვანელი აკაკი საღინაძეა, რომელიც წლებია სამოქალაქო აქტივიზმშია ჩართული.
  • მზარდი საზოგადოებრივი პროტესტისა და საერთაშორისო კრიტიკის ფონზე, ქართულმა ოცნებამ განაცხადა, რომ კანონპროექტს უკან გაიწვევს, თუმცა, პარალელურად, დაიწყებს ხალხთან დიალოგს და შემეცნებითი ხასიათის კონსულტაციებს ჩასაგდებად გადადებული კანონის ავკარგიანობაზე.

დეტალები: შემთხვევა გუშინ ღამე მოხდა, აქტივისტის თქმით, არ იცის ვინ დატოვა წარწერები, თუმცა ყველასთვის ცნობილია, ვინ უჭერს მხარს რუსულ კანონს.

  • ქართული ოცნების დეპუტატი, დიტო სამხარაძე ამტკიცებდა, რომ წარწერები ჯაშუშობაზე სწორედ იმ აქტივისტების სახლთან გაჩნდა, რომლებმაც ქუთაისელი მაჟორიტარი დეპუტატის სახლთან წარწერები 2 დღის წინ თავად დატოვეს.
  • აკაკი საღინაძე ბრალდებას სიცრუეს უწოდებს, და აცხადებს, რომ ქუთაისში გამართულ საპროტესტო აქციაზე შეკრებილ ადამიანებს თავად მოუწოდებდა, თავი შეეკავებინათ ძალადობრივი ქმედებებისგან.
  • საღინაძის შეფასებით, ადამიანები მარტივად გაარჩევენ თავისუფლებისთვის მებრძოლ და სისტემის მორჩილ და მართულ ადამიანებს.

ქუთაისში საპროტესტო დღესაც აქცია გრძელდება.

  • წინააღმდეგობის აქტი ცენტრალურ მოედანზე დაიწყო, სადაც მოქალაქეებმა ცოცხალი ჯაჭვი შეკრეს.
  • აქტივისტები უერთდებიან სამოქალაქო საზოგადოების მოთხოვნებს, ითხოვენ აქციაზე უკანონოდ დაპატიმრებული ადამიანების განთავისუფლებას და აცხადებენ, რომ ქალაქში არის სხვა პრობლემებიც, რის ირგვლივაც იქ შეკრებილი საზოგადოება გაერთიანდა.
  • "ტრიუკები მათთვის ნაცადი ფორმაა, განსაკუთრებით მაშინ, როცა საკანონმდებლო ლაფსუსები შეიძლება იყოს ამის შეფერხების მიზეზი. ამიტომ სანამ ბოლომდე არ გამოიტანენ კანონს და სანამ ქვეყნის სახელმწიფო ორგანოებში მსგავსი ტიპის რუსული რეგულირების საერთოდ აზრი არ გაქრება, პროტესტი გაგრძელდება", — აცხადებს საღინაძე.