ამის შესახებ თსუ-ს იურიდიული ფაკულტეტის სტუდენტები და კურსდამთავრებულები განცხადებას ავრცელებენ.

რატომ არის მნიშვნელოვანი: 7 მარტს პარლამენტმა პარლამენტმა რუსული კანონი პირველი მოსმენით, 76 მხარდამჭერით მიიღო.

  • კენჭისყრა პოლიტიკური დაპირისპირებისა და აქციების ფონზე მიმდინარეობდა.
  • ხელისუფლებამ აქციის მონაწილეთა წინააღმდეგ რამდენიმე სპეციალური საშუალება გამოიყენა, მათ შორის, ცრემლსადენი გაზი, წიწაკის სპრეი, წყლის ჭავლი.

დეტალები: სტუდენტები გმობენ რუსულ კანონს და ამბობენ, რომ ის არღვევს საქართველოს კონსტიტუციის პრინციპებს და ძირს უთხრის საქართველოს სწრაფვას ევროპული მომავლისკენ.

  • მათივე თქმით, კანონპროექტის შინაარსი და მიზანი სრულად ემთხვევა 2012 წლის შემდეგ რუსეთში ადამიანის უფლებების ორგანიზაციების, დამოუკიდებელი მედიისა და სამოქალაქო საზოგადოების რეპრესირებისთვის მიღებულ კანონმდებლობას.
  • "კანონპროექტი დამაზიანებელია და საფრთხეს უქმნის საქართველოს თითოეული მოქალაქის ფუნდამენტურ უფლებებს. ის მკვეთრად უარყოფით ზეგავლენას მოახდენს სამოქალაქო საზოგადოების ჯგუფებზე", — ნათქვამია განცხადებაში.
  • განმარტავენ, რომ კანონი ფუნდამენტურად ეწინააღმდეგება საქართველოს კონსტიტუციით გაცხადებულ სწრაფვას და უგულებელყოფს ევროკომისიის მიერ გაცემული 12 რეკომენდაციის.
  • სტუდენტების თქმით, სამწუხაროა კანონპროექტის მხარდამჭერებს შორის მათი ყოფილი და მოქმედი ლექტორების — ირაკლი კობახიძის, გიორგი კახიანისა და ანრი ოხანაშვილის ნახვა.
  • "კანონპროექტის მხარდაჭერით, მათ უარი განაცხადეს იმ პრინციპების ერთგულებაზე, რომლებზეც საუნივერსიტეტო სივრცეში საუბრობდნენ, მათი დიდი ნაწილისგან ჩვენ არ მოგვისმენია პარლამენტის მიერ მხარდაჭერილი ანტიკონსტიტუციური კანონპროექტის კრიტიკა", — წერენ სტუდენტები.

სტუდენტები მოუწოდებენ ფაკულტეტის დეკანს თამარ ზარანდიას, ადმინისტრაციულ და აკადემიურ პერსონალს, ღიად და მკაფიოდ დააფიქსირონ პოზიცია კანონპროექტისა და ქვეყნის ევრო-ატლანტიკური მომავლის დამაზიანებელი პროცესების შესახებ.

  • "ასევე საქართველოს პარლამენტს, არ დაარღვიოს საქართველოს კონსტიტუციის 78-ე მუხლით გათვალისწინებული ვალდებულება", — ნათქვამია განცხადებაში.
  • სტუდენტებს მიაჩნიათ, რომ ქვეყნის მოქალაქეების მოვალეობა კონსტიტუციის ფუნდამენტური პრინციპების დაცვა და ევრო-ატლანტიკური მომავლისკენ სწრაფვის ხელშეწყობაა.