სტუდენტები: არ გვინდა წარმოვადგენდეთ ხელოვნებას, რომელიც გამოხატვის თავისუფლებაზე არ დგას

7 Mar. 2023, 12:14

ჩვენ არ გვინდა გვქონდეს კანონი უცხოური გავლენის გამჭვირვალობის შესახებ, რადგან ის საქართველოს მოქალაქეს იძულებულს გახდის, დარეგისტრირდეს უცხოური გავლენის აგენტად. რადგან ის დაარღვევს შემოქმედების თავისუფლებას და ხელოვანის ინტელექტუალური საკუთრების უფლებას. რადგან მისი მიხედვით შემოქმედს შეეზღუდება საქმიანობა და დადგება უცხოური გავლენის აგენტად დაკავშირებული საშიშროების შესახებ. რადგან კანონი აამოქმედებს ცენზურას, შესაბამისად, აღნიშნული კანონი არღვევს საქართველოს მოქალაქის უფლებებსა და რაც ყველაზე მთავარია, თავისუფლებას.

მიგვაჩნია, რომ უცხოური გავლენის აგენტების კანონის განხილვით ქვეყნის დემოკრატიას და თითოეულ მოქალაქის გამოხატვის თავისუფლებას საფრთხის ქვეშ აყენებს. ეს კანონი არის რუსული, რადგან ჯაშუშის იარლიყის მიკერება, სამოქალაქო ორგანიზაციების საქმიანობის შეზღუდვა და ფინანსურ კოლაფსამდე მიყვანა ცნობილი რუსული პრაქტიკაა. რუსეთი ჩვენი მტერია. რუსეთი ასევე მტერია დემოკრატიული ღირებულებების. ჩვენთვის, როგორც კულტურის სფეროს ახალგაზრდა თაობისთვის განსაკუთრებით მტკივნეულია მოცემული კანონის ამოქმედების შესაძლებლობის გაცნობიერება. მტკივნეულია, რადგან ჩვენ გვეზღუდება განათლების მიღების, საზღვარგარეთული პრაქტიკებისა თუ თეორიების გაცნობის, ცოდნის გაფართოების შესაძლებლობების რეალიზების უფლება. მტკივნეულია, რადგან არ გვსურს განმეორდეს ტრაგედია, რომელიც გასული საუკუნის დასაწყისში ქართულმა კულტურამ ახალგაზრდა ხელოვანების აგენტებად გამოცხადების შემდეგ მათი ფიზიკური განადგურების შედეგად გადაიტანა.

ჩვენ არ გვინდა წარმოვადგენდეთ ხელოვნებას, რომელიც მთავარ ღირებულებაზე გამოხატვის თავისუფლებაზე არ დგას. რადგან ასეთი ხელოვნება ჩანასახშივე განწირულია სიკვდილისთვის. ჩვენ არ გვინდა გვქონდეს კანონი უცხოური გავლენის გამჭვირვალობის შესახებ, რადგან წარმოვადგენთ თაობას, რომელსაც სურს, იცხოვროს თავისუფალ, თანასწორ, სოლიდარულ საზოგადოებაში. მზად ვართ, ვიბრძოლოთ ჩვენი ქვეყნის ინტერესების დაცვისთვის და დავუპირისპირდეთ მიმდინარე მავნებლურ პროცესებს.

ბოლო ამბები: