არასამთავრობო ორგანიზაციების ნაწილი საქართველოს კონსტიტუციიდან თავისუფლების აქტის ამოღებას ეწინააღმდეგება და აცხადებს, რომ მოქალაქეებს უნდა შეუნარჩუნდეთ უფლება, რეფერენდუმით მიიღონ გადაწყვეტილება ახალი გადასახადის შემოღებისა თუ არსებული გადასახადების გაზრდის შესახებ.

"უნდა გამოირიცხოს მთავრობის მიერ ამ საკითხზე გადაწყვეტილების ერთპიროვნულად მიღების შესაძლებლობა" - აცხადებენ NGO-ები.

არასამთავრობოების თქმით, აღნიშნული ჩანაწერის ამოღება ცალსახად ნეგატიურად უნდა შეფასდეს ქვეყნის საინვესტიციო მიმზიდველობისა და ბიზნეს გარემოს განჭვრეტადობის კუთხით.

განცხადებას ხელს აწერს ცხრა NGO:

  • საერთაშორისო გამჭვირვალობა - საქართველო (TI Georgia)
  • ეკონომიკური პოლიტიკის კვლევის ცენტრი (EPRC)
  • საქართველოს დემოკრატიული ინიციატივა (GDI)
  • სამართლიანი არჩევნების და დემოკრატიის საერთაშორისო საზოგადოება (ISFED)
  • საზოგადოება და ბანკები
  • ევროპა საქართველოსთვის
  • Policy and Management Consulting Group
  • ISET-ის კვლევითი ინსტიტუტი
  • საქართველოს ატლანტიკური საბჭო

პარლამენტში მიმდინარე საკომიტეტო განხილვების ფარგლებში გაჟღერდა მოსაზრება, საქართველოს კონსტიტუციიდან 94-ე (ახალი რედაქციით 67-ე) მუხლის ამოღების შესახებ.

94-ე მუხლი, იგივე თავისუფლების აქტი გულისხმობს რეფერენდუმის ჩატარებას იმ შემთხვევაში, თუ მთავრობას საერთო-სახელმწიფოებრივი გადასახადის ახალი სახის შემოღების, (გარდა აქციზისა) ან არსებული განაკვეთის ზედა ზღვრის გაზრდის სურვილი ექნება.