განცხადება მასწავლებლის ეროვნული ჯილდოს Facebook გვერდზე გამოქვეყნდა.

დეტალები: მასწავლებლების განცხადებით, უკიდურესად შეწუხებულნი არიან "უცხოელი აგენტების" შესახებ კანონპროექტებით, რომლებსაც საქართველოს პარლამენტი განიხილავს.

  • "მიგვაჩნია, რომ კანონპროექტი არ ემსახურება საქართველოს მოსახლეობის საჭიროებებს და ზიანს მოუტანს მის უდიდეს უმრავლესობას. რაც მთავარია, მისი განხილვაც კი, საფრთხეს უქმნის საქართველოსთვის ევროკავშირის კანდიდატის სტატუსის მინიჭებას და საქართველოს ევროკავშირსა და ნატო-ში გაწევრიანებას"
  • ისინი ავტორებს კანონპროექტის გაწვევისკენ მოუწოდებენ, ხოლო პარლამენტსა და მმართველ პარტიას, არ დაუჭირონ მხარი.
  • ასევე მოუწოდებენ საჯარო უწყებებს და იქ დასაქმებულ ადამიანებს, განსაკუთრებით კი საქართველოს საგარეო საქმეთა სამინისტროს და საქართველოს განათლებისა და მეცნიერების სამინისტროს, რომ ხმა აიმაღლონ არსებული კანონპროექტის წინააღმდეგ.
  • და ბოლოს, მოუწოდებენ საზოგადოებას, განსაკუთრებით კი კოლეგებს, გამოხატონ პროტესტი, რათა არ დაუშვან კანონპროექტის მიღება.

რატომ არის მნიშვნელოვანი: ქართული ოცნებიდან წამოსული დეპუტატებით დაკომპლექტებულმა ანტიდასავლურმა მოძრაობამ, ხალხის ძალამ კანონპროექტი შეიმუშავა, რომლის მიზანიც მედიისა და არასამთავრობო ორგანიზაციების დისკრედიტაციაა.

  • ამჟამად უმრავლესობის წევრებს "უცხოური გავლენის აგენტების" შესახებ ორი კანონპროექტი აქვს ინიციირებული და ორივე მათგანს კომიტეტებზე განიხილავენ.
  • კანონპროექტის დაინიცირებისა და განხილვის დაწყებას აქტიურად აპროტესტებენ არასამთავრობო სექტორისა და მედიის წარმომადგენლები.
  • საქართველოს პარტნიორი ქვეყნები და ევროსტრუქტურების წარმომადგენლები ერთხმად აცხადებენ, რომ კანონპროექტის ნებისმიერი ფორმით მიღება ქვეყნის ევროატლანტიკურ მომავალს საფრთხის ქვეშ დააყენებს.

"არა რუსულ კანონს": საუნივერსიტეტო საზოგადოების უარი თავისუფლების, ცოდნის და მომავლის კონტროლს — ამ სათაურით პეტიციას აქვეყნებს უმაღლესი საგანმანათლებლო დაწესებულებების აკადემიური პერსონალი, მკვლევრები, უმაღლესი განათლების ადმინისტრატორები და სტუდენტები.

  • პეტიცია სათეატრო სფეროს წარმომადგენლებმაც შეიმუშავეს, სადაც აღნიშნულია, რომ ინიციირებაც კი შეურაცხმყოფელია საქართველოს მოქალაქეებისათვის.
  • კულტურის სფეროს წარმომადგენლებიც აპროტესტებენ რუსულ კანონს და საქართველოს პარლამენტის კულტურის კომიტეტის თავმჯდომარისა და მისი მოადგილის სახელზე ღია წერილს აქვეყნებენ.
  • საჯარო სამართლის საერთაშორისო საზოგადოება (ICON•S) კანონპროექტთან დაკავშირებით ევროინტეგრაციისა და სხვა მიმართულებებით საფრთხეებზე საუბრობს.