ბრიტანული ოჯახი ცოტა ხნის წინ კარიბის ზღვის აუზის კუნძულოვან სახელმწიფოს, გრენადას, ეწვია და საჯაროდ მოუბოდიშა მათი წინაპრების მონათმფლობელური ისტორიის გამო. ოჯახი, რომელსაც წინათ ათასზე მეტი ადამიანი ჰყავდა დამონებული, გრენადას კომპენსაციის სახით 100 ათასი გირვანქა სტერლინგის ($121 ათასი) გადახდასაც დაჰპირდა.

ოჯახის ერთ-ერთმა წევრმა და BBC-ის ამერიკელმა ჟურნალისტმა, ლორა ტრეველიანმა, საკუთარი წინაპრების ისტორია თავადვე გამოიკვლია და თანხაც გადაურიცხა კარიბის ზღვის ქვეყნების ერთ-ერთ უნივერსიტეტს.

ამასთან, ტრეველიანი გრენადის დედაქალაქში სიტყვით გამოვიდა, ცერემონიას კი ქვეყნის პრემიერმინისტრიც ესწრებოდა. ჟურნალისტის თქმით, საჯარო ბოდიში მისი ოჯახის პირველი ნაბიჯია მხოლოდ. ოჯახის ერთ-ერთმა წევრმა ასევე დაამატა, რომ მონობა კაცობრიობის წინაშე ჩადენილი დანაშაული იყო და ამ პროცესში მათი წინაპრების მონაწილეობას გმობენ.

საჯარო ბოდიშის წერილს გრენადის ექვს პლანტაციაში წილის მფლობელების 104 შთამომავალი აწერს ხელს.

ამასთან, ტრეველიანის ოჯახმა ბრიტანეთის პრემიერმინისტრს, რიში სუნაკსაც, მოუწოდა, კარიბის ზღვის ქვეყნებთან საუკუნოვანი ექსპლუატაციის გამო კომპენსაციის გადახდაზე მოლაპარაკებები დაიწყოს.

პროფესორ ჰილარი ბეკლსის თქმით, ბრიტანელებმა კარიბის ზღვის ქვეყნებში 3,5 მილიონი აფრიკელი ჩაიყვანეს, გათავისუფლებებისას კი მათი რაოდენობა მხოლოდ 600 ათასიღა იყო. ბეკლსი ასევე ამბობს, რომ მონები პლანტაციებში მძიმე სამუშაო პირობების გამო მხოლოდ 7-დან 10-წლამდე პერიოდს თუ ყოფდნენ.

კოლონიალური წარსულის გამო, კარიბის ზღვის ქვეყნებში კომპენსაციის მომხრეები ტრილიონობით ფუნტს ითხოვენ. ამის გამო, ბრიტანეთის სამეფო ოჯახის ვიზიტებს რეგიონში, როგორც წესი, დემონსტრაციები ერთვის ხოლმე თან. გასულ წელს ცნობილმა ამერიკელმა მსახიობმა და ტელეწამყვანმა, ვუპი გოლდბერგმა, უინძორების სამეფო ოჯახისგან მონებით ვაჭრობაში ბრიტანეთის იმპერიის მონაწილეობის გამო ბოდიშის საჯაროდ მოხდაც მოითხოვა.