მილანის მოდის კვირეულის Diesel-ის ჩვენებაზე მისულ სტუმრებს სცენაზე პრეზერვატივების გიგანტური მთა დახვდათ. Diesel-მა 2023 წლის შემოდგომა-ზამთრის კოლექცია Durex-ის 200 ათასი პრეზერვატივის ფონზე წარმოადგინა. ბრენდის შემოქმედებითი ხელმძღვანელის თქმით, ასე გაუსვეს ხაზი უსაფრთხო სექსის მნიშვნელობას და თან საზოგადოებას Durex-თან მომავალი პარტნიორობის შესახებ შეატყობინეს.

ფოტო: Getty Images

"გაერთეთ, ერთმანეთს პატივი ეცით და უსაფრთხოდ იყავით", — განაცხადა Diesel-ის შემოქმედებითმა ხელმძღვანელმა, გლენ მარტენსმა. 2023 წლის შემოდგომა-ზამთრის კოლექციის მთავარი თემები თავისუფლება, სიამოვნება და ექსპერიმენტი იყო, მოდელებმა კი სამოსი 200 ათასი პრეზერვატივის ფონზე წარმოადგინეს. დამსწრეების თქმით, ჩვენებისთვის შერჩეული მუსიკაც კოლექციის თემას აგრძელებდა და მომენტებში კვნესის ხმაც ისმოდა.

ეს პირველი შემთხვევა არ არის, როცა Diesel-მა ჩვენებაზე დამსწრეებს ორიგინალური სანახაობა შესთავაზა. გასულის წლის სექტემბერში 2023 წლის გაზაფხული-ზაფხულის კოლექციის ჩვენება ბრენდმა უზარმაზარი გასაბერი სკულპტურის ფონზე ჩაატარა, რითაც გინესის რეკორდსმენიც გახდა. მანამდე კი ბრენდმა ჩვენებაზე დასასწრებად ყველა მსურველი მიიწვია, რითაც მოდის კვირეულის მასპინძლობის ნორმები დაარღვია.

ფოტო: Getty Images

Diesel-ის წლევანდელი ჩვენების სტუმრებს კი მოსაწვევები Durex-ის შეფუთვით დაეგზავნათ. Diesel-ის თქმით, ბრენდის ყველა მაღაზიაში მთელი მსოფლიოს მასშტაბით დამატებით Durex-ის 300 ათას პრეზერვატივს გააგზავნის.