იაპონიის ერთ-ერთ სანაპიროზე ადგილობრივმა მცხოვრებმა დიდი რკინის ბურთი შენიშნა, რომელიც ოკეანემ გამორიყა. ქალმა ამის შესახებ პოლიციას აცნობა, თუმცა ადგილზე მისულმა ოფიცრებმა ვერ დაადგინეს, როგორ მოხვდა ბურთი სანაპიროზე. ხელისუფლებამ კი განაცხადა, რომ წარმოდგენა არ აქვს, ეს რა არის, თუმცა იციან, რომ ბურთი ფეთქებადი არაა.

1,5 მეტრი დიამეტრის მქონე ამოუცნობი დანიშნულების ბურთი ოკეანემ ქალაქ ჰამამაცუს ნაპირზე გამორიყა. ბურთის წარმომავლობის დასადგენად ექსპერტები ამ დრომდე მუშაობენ, თუმცა არც ის იციან, რკინის ბურთს ჩინეთთან ან ჩრდილოეთ კორეასთან რამე თუ აკავშირებს. ბურთს ორი სახელური აქვს, ამიტომ ვარაუდობენ, რომ ის რაღაცაზე იყო მიბმული, რასაც წყალმა ჩამოაშორა.

ფოტო: The Guardian

ადგილობრივი ქალის თქმით, ის სანაპიროზე სეირნობდა, როცა უცნაური ფორმის ბურთი შენიშნა. პოლიციამ ტერიტორია შემოსაზღვრა და იქ მხოლოდ ექსპერტებს უშვებენ, თუმცა ჯერჯერობით დასკვნების გაკეთებისგან ისინიც თავს იკავებენ.

სანამ ექსპერტები მისტიკური ბურთის საიდუმლოს ვერ ხსნიან, ვიდეო ინტერნეტში ვირუსულად ვრცელდება. სოციალურის ქსელების მომხმარებლები კი ბურთის შესახებ ხუმრობენ: ზოგმა რკინის ბურთი ცნობილ მანგას, Dragon Ball-ს დაუკავშირა, ზოგსაც კი ჩინეთის "ჯაშუში" ბურთი გაახსენდა.