CRRC-საქართველომ საზოგადოებრივი აზრის შესასწავლად, დემოკრატიის ეროვნული ფონდის (NED) ფინანსური მხარდაჭერით, მოსახლეობის წარმომადგენლობითი გამოკითხვა ჩაატარა.

რატომ არის მნიშვნელოვანი: კვლევის მიხედვით, საქართველოს მოქალაქეების უმრავლესობა მიიჩნევს, რომ რუსეთი უკრაინის ოკუპაციას ვერ შეძლებს, თუმცა, აზრები იყოფა იმის შესახებ, შეძლებს უკრაინა თავისი ტერიტორიების სრულად, თუ მხოლოდ ნაწილობრივ გათავისუფლებას.

• მათივე ინფორმაციით, ოპოზიციის მხარდამჭერები უფრო მეტ ოპტიმიზმს გამოხატავენ უკრაინის წარმატების მიმართ, ვიდრე ქართული ოცნების მხარდამჭერები და პარტიებისადმი მიუმხრობელი ადამიანები.

დეტალები: მოსახლეობის მხოლოდ 5% ამბობს, რომ ომი რუსეთის მიერ უკრაინის ტერიტორიის სრული ოკუპაციით დასრულდება.

• დანარჩენი ნაწილი დაახლოებით თანაბრად იყოფა მათ შორის, ვინც ფიქრობს, რომ ომი ნაწილობრივი ოკუპაციით დასრულდება; უკრაინის ტერიტორიების სრულად გათავისუფლებით დასრულდება და ვისაც ამ კითხვაზე პასუხის გაცემა უჭირს.
• ჯგუფებს შორის განსხვავება არ იკვეთება და მხოლოდ ოპოზიციის მხარდამჭერები გამოირჩევიან უკრაინის ტერიტორიების სრულად გათავისუფლების ყველაზე დიდი მოლოდინით — 52%, როდესაც სხვა ჯგუფებში ეს სიდიდე მაქსიმუმ 39%-ს აღწევს.

ლიდერების შეფასება უკრაინაში მიმდინარე ომზე: უცხოელ ლიდერებს შორის რესპონდენტები დადებითად აფასებენ ვოლოდიმირ ზელენსკის, ბორის ჯონსონისა და ჯო ბაიდენის როლს, ხოლო ალექსანდრე ლუკაშენკოსა და ვლადიმერ პუტინის როლს — უარყოფითად.

• კვლევამ აჩვენა, რომ უკრაინის ხელმძღვანელობის, ისევე, როგორც უკრაინის მხარდამჭერი დასავლელი ლიდერების როლს, ქართული საზოგადოება დადებითად აღიქვამს, ხოლო საქართველოს ხელმძღვანელობის ქმედებების შეფასება იცვლება იმის შესაბამისად, თუ რომელ პარტიას უჭერს ესა თუ ის ადამიანი მხარს.
• მოსახლეობის 4% ძალიან დადებითად აფასებს სალომე ზურაბიშვილი ქმედებებს ამ ომთან მიმართებაში, 42% — მეტწილად დადებითად, 16% — მეტწილად უარყოფითად, 13% — ძალიან უარყოფითად.
• ირაკლი ღარიბაშვილის შემთხვევაში მონაცემები ასეთია: 16% — ძალიან დადებითად, 39% — მეტწილად დადებითად, 15% — მეტწილად უარყოფითად, 9% — ძალიან უარყოფითად.

მეთოდოლოგია: CRRC-ის ინფორმაციით, მოსახლეობის რაოდენობრივი სატელეფონო გამოკითხვა 2022 წლის 29 აგვისტოდან 5 სექტემბრის ჩათვლით პერიოდში ქართულ, სომხურ, აზერბაიჯანულ და რუსულ ენებზე ჩატარდა.

• ჯამში გამოიკითხა 1 523 ზრდასრული (18 წლის და უფროსი) საქართველოს მოქალაქე.
• გამოკითხვაში გამოყენებულ შერჩევასა და მოსახლეობის დემოგრაფიულ მონაცემებს შორის განსხვავებების კომპენსაციის მიზნით, ანგარიშში შეწონილი შედეგები გაანალიზეს.
• გარდა ამისა, გამოკითხვის ფარგლებში CRRC-საქართველომ რანდომიზებული ექსპერიმენტი ჩაატარა, რომლის ფარგლებში რესპონდენტების ერთმა ჯგუფმა მოისმინა ინფორმაცია, რომელიც უკრაინის წარმატებებს უსვამდა ხაზს, მეორემ — ინფორმაცია, რომელიც აქცენტს უკრაინის დანაკარგებზე აკეთებდა, მესამეს კი დამატებითი ინფორმაცია არ მიუღია.
• ავტორის განცხადებით, ექსპერიმენტმა აჩვენა, რომ მიწოდებული ინფორმაციის შინაარსი გავლენას ახდენს ზოგიერთი ჯგუფის განწყობაზე რუსეთთან კომპრომისის მიმართ.
• მათი თქმით, დანაკარგების შეტყობინებამ ყველაზე საგრძნობი ზეგავლენა იქონია სხვებზე უფრო პროდასავლურად განწყობილ ჯგუფებში, რომლებიც ამავდროულად ყველაზე ნაკლებად უჭერდნენ მხარს რუსეთთან რაიმე კომპრომისს.