კურიერები დღეს, 19 თებერვალს აქციას კომპანიის ოფისთან გამართეს.

რატომ არის მნიშვნელოვანი: Wolt-ის კურიერები ანაზღაურებას ზრდასა და ღირსეული სამუშაო პირობებს ითხოვენ.

  • ასევე ითხოვენ კოლექტიურ შეხვედრას, რომელსაც მათი მხრიდან დაესწრებიან ორგანიზაციები, სახალხო დამცველი და ასევე შრომის ინსპექტორი.
  • "გვინდა, თავიანთი ხარჯებით იქირაონ საკონფერენციო დარბაზი, სადაც კურიერების უმრავლესობა დაესწრება. არ გვინდა მხოლოდ ორგანიზატორების ასვლა — რადგან წინა აქციებისას, როდესაც მხოლოდ ორგანიზატორები ადიოდნენ, საერთო მოთხოვნები არ დაკმაყოფილდა", — ამბობს ერთ-ერთი კურიერი.

Wolt: როგორც კომპანიის გენერალური დირექტორი სერგო მარღანია ამბობს, ვერ შედგება "კონსტრუქციული დიალოგო 200 ადამიანთან საუბრისას".

  • "ჩვენ არ გვაქვს პარტნიორ კურიერებთან ხელშეკრულების დეტალებზე საუბრის უფლება გარე პირებთან ერთად";
  • "ჩვენ მათ შევთავაზეთ კონკრეტულ დროს, კონკრეტულ პირებთან შეხვედრა. ამ შეხვედრებზე დარეგისტრირდა დაახლოებით 100 კურიერი. შესაბამისად მომდევნო კვირას ჩვენ მათთან შეხვედრებს ჩავატარებთ", — თქვა მარღანიამ.