ბოლო მონაცემებით, თურქეთსა და სირიაში მიწისძვრის შედეგად დაღუპულთა რიცხვი 44 ათასამდე გაიზარდა.

რატომ არის მნიშვნელოვანი: 7,8-ბალიანი დამანგრეველი მიწისძვრა თურქეთ-სირიის საზღვართან 6 თებერვალს მოხდა.

  • თურქეთისა და სირიის რამდენიმე ქალაქი თითქმის მთლიანად განადგურდა, ათასობით ადამიანი კი დაშავდა.
  • მოსალოდნელია, რომ ეს რიცხვი გაიზრდება, რადგან ნანგრევების გასუფთავება და სამაშველო სამუშოები ჯერ კიდევ გრძელდება.
  • მაშველების განცხადებით, მიწისძვრიდან ერთ კვირაზე მეტი ხნის შემდეგაც კი, ნანგრევებიდან ადამიანების ხმები ისევ ისმის.

დეტალები: მიუხედავად იმისა, რომ მომხდარიდან უკვე საკმაოდ დიდი დრო გავიდა, მაშველებმა ნანგრევებიდან არა ერთი ადამიანის ცოცხლად გამოყვანა შეძლეს.

  • CNN-ის ცნობით, 10 დღის შემდეგ, ნანგრევებიდან რამდენიმე არასრულწლოვანი, მათ შორის 12 წლის ბიჭი ამოიყვანეს.
  • ხოლო 17 წლის გოგონა იპოვეს და მისი გადარჩენა შეძლეს მაშინ, როცა დანგრეული შენობებიდან დაღუპული ადამიანები ამოჰყავდათ.

გაეროში ზუსტი რიცხვს ვერ ასახელებენ, თუმცა ამბობენ, რომ მიწისძვრას ორ ქვეყანაში რამდენიმე ათასი ბავშვი ემსხვერპლა.

  • UNICEF-ის ცნობით, დაშავდა 7 მილიონზე მეტი ბავშვი, მათგან 4,6 მილიონზე მეტი თურქეთის, ხოლო 2,5 მილიონზე მეტი კი სირიის მაცხოვრებელია.
  • გაეროში აცხადებენ, რომ მთავარ პრობლემად კვლავ წყლისა და სანიტარული საშუალებების ხელმისაწვდომობა რჩება.
  • "ბევრმა ოჯახმა დაკარგა სახლი და ახლა დროებით თავშესაფრებში ცხოვრობენ, ხშირად ყინვის პირობებში და მათ ტანჯვას თოვლი და წვიმა ემატება", — განაცხადა გაეროს წარმომადგენელმა.