15 ივნისს, ევროპარლამენტი საქართველოდან გატაცებული აზერბაიჯანელი ჟურნალისტის, აფგან მუხტარლის საქმესა და აზერბაიჯანში არსებულ მედიის მდგომარეობას განიხილავს და რეზოლუციას პლენარულ სხდომაზე კენჭს უყრის.

განხილვის თემაში შედის ფუნდამეტური თავისუფლების, ადამიანის უფლებებისა და დემოკრატიის მიმართულებით არსებული ვითარება აზერბაიჯანში.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს, რასაც საქართველოს ხელისუფლება უარყოფს. შსს ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.

რამდენიმე დღის წინ, აზერბაიჯანის პარლამენტის წევრმა განაცხადა, რომ აფგან მუხტარლის გატაცება საქართველო-აზერბაიჯანის ერთობლივი და წარმატებული სპეცოპერაციის შედეგია. აღნიშნულს გამოეხმაურა საქართველოს უსაფრთხოების სამსახური და განცხადებაში უარყო რაიმე სახის მონაწილეობას აფგან მუხტარლის დაკავების საქმეში.