აზერბაიჯანის პროკურატურა აცხადებს, რომ ჟურნალისტი აფგან მუხთარლი ადგილობრივი დროით, 29 მაისს, 22:40 საათზე, ბალაკანის რაიონში, საზღვრის უკანონოდ კვეთის დროს დააკავეს. აღნიშნული რაიონი ლაგოდეხს ესაზღვრება. განცხადება ცოტა ხნის წინ გაავრცელა აზერბაიჯანულმა მედიამ.

პროკურატურა აცხადებს, რომ დაპატიმრებისას, ჟურნალისტმა პოლიციას წინააღმდეგობა გაუწია და თან დიდი მოცულობის თანხა ჰქონდა.

აფგან მუხთარლი აზერბაიჯანის ხელისუფლების მიერ დევნილი ჟურნალისტია, რომელიც თავს თბილისს აფარებდა ოჯახთან ერთად. მისი ცოლის, ლეილა მუსტაფაევას თქმით, აფგანი თბილისში, სოლოლაკის ტერიტორიიდან 29 მაისს დაიკარგა, მოგვიანებით კი აღმოჩნდა, რომ ის აზერბაიჯანშია დაპატიმრებული საზღვრის უკანონოდ კვეთის ბრალდებით. მუსტაფაევას თქმით, მას აინტერესებს, როგორ გადაკვეთა მუხთარლიმ საქართველო-აზერბაიჯანის საზღვარი მაშინ, როცა მისი პასპორტი თბილისში, სახლში ჰქონდა დატოვებული. თავად მუხთარლიმ აზერბაიჯანში ადვოკატს უთხრა, რომ ის ნაცემია.

საქართველოს შინაგან საქმეთა სამინისტრო ამბობს, რომ მათ გამოძიება ადამიანის თავისუფლების უკანონოდ აღკვეთის მუხლით დაიწყეს, თუმცა, ჯერ არ განუმარტავთ, როგორ აღმოჩნდა თბილისში დაკარგული ჟურნალისტი ბაქოს ციხეში. აფგან მუხთარლში ჯერ კიდევ რამდენიმე დღის წინ ამბობდა, რომ აზერბაიჯანის ხელისუფლების მიერ დევნილ პირებს საქართველოში საფრთხე ემუქრებათ, რადგან მათ თავშესაფარს არ აძლევენ და უკან, აზერბაიჯანში აბრუნებენ, სადაც წამება და მრავალწლიანი პატიმრობა ელოდებათ

ქართველი ადვოკატის თქმით, მუხთარლის ჩამტვრეული აქვს ნეკნების ძვლები და სახეზე დაზიანებები აქვს.