ყოფილი შს მინისტრი გუშინ ფეიგინის გადაცემაში ჩაერთო.

რატომ არის მნიშვნელოვანი: ბოლო დროს განვითარებული მოვლენების შემდეგ ეს მერაბიშვილის პირველი ხანგრძლივი ინტერვიუა.

  • მან გადაცემაში მიმოიხილა ენმ-ში ჩატარებული არჩევნები, სააკაშვილის ჯანმრთელობის მდგომარეობა და საქართველოს საგარეო კურსი და ივანიშვილის პერსონა.
  • ასევე დააანონსა ენმ-ის გლობალური აქცია, რომელიც 20 თებერვალს სხვადასხვა დედაქალაქში იგეგმება მიხეილ სააკაშვილის მხარდასაჭერად.

არჩევნები ენმ-ში: მერაბიშვილის შეფასებით, პარტიის ხელმძღვანელობის ცვლილება უნიკალური შესაძლებლობა იყო.

  • "პარტიის ყოფილ ხელმძღვანელობასთან მთავარი პრეტენზიები იყო პასიურობა, არააქტიური მოქმედებები სააკაშვილის დასაცავად, პასიურობა მიტინგებთან მიმართებაში და ა.შ.", — განაცხადა მან.
  • ის იმედოვნებს, რომ ახალი ხელმძღვანელობით პარტია რამდენიმე თვეში შეცვლის სიტუაციას საქართველოში.
  • ნიკა მელიას ფარულ ჩანაწერზე და მის მიმართ გაჟღერებულ ბრალდებებზე არ უსაუბრია.

სააკაშვილი: ყოფილი შსს მინისტრის თქმით, ექსპრეზიდენტი ექსპრემიერისთვის ყველაზე საშიში მოწინააღმდეგეა.

  • "ივანიშვილი მას [სააკაშვილს] საკუთარ და პუტინის N 1 მტრად მიიჩნევს", — აცხადებს ის.
  • "ივანიშვილი საქართველოში რუსეთს აწყობს, ქვეყანას, სადაც ყველა ალტერნატიული პოზიცია მიუღებელია", — განმარტა მან.
  • მერაბიშვილი იმედოვნებს, რომ ენმ-ის ახალი თავმჯდომარე, ლევან ხაბეიშვილი სააკაშვილის ჯანმრთელობის დასაცავად აქტიურ ზომებს მიიღებს.

რუსული კურსი: მერაბიშვილის შეფასებით, ომამდე საქართველოს მთავრობა ახერხებდა ფორმალურად ლავირებას და რუსეთსა და დასავლეთთან ურთიერთობის დალაგებას, თუმცა, 24 თებერვლის შემდეგ მათ ცალსახად რუსული პოზიცია დაიჭირეს.

  • ის უკრაინელ ხალხს ბოდიშს უხდის საქართველოს მთავრობის არასაკმარისი მხარდაჭერის გამო.
  • "100%-ით შემიძლია ვთქვა, საქართველოს ხელისუფლება არ წარმოადგენს ქართველ ხალხს", — დაამატა მან.
  • "მე 25 თებერვალს კიევში გავფრინდი და იქ რამდენიმე თვე ვცხოვრობდი. მორალურად და ფიზიკურად, როგორც შემეძლო უკრაინის ომში ვმონაწილეობდი. ბევრი მოხალისე ჩამოვიდა იმ პერიოდში საქართველოდან, ჩვენ მათ ვეხმარებოდით, ჰუმანიტარული დახმარებითა და სხვადასხვა ფორმით", — იხსენებს მერაბიშვილი.
  • "უკრაინამ საქართველოს ევროპის კარები გაუღო, საქართველო ამ პროცესებში დღეს აუტსაიდერია", — აცხადებს ის.
  • მერაბიშვილი ივანიშვილს რუს ბიზნესმენს უწოდებს, რომელიც ახერხებს, არაფორმალურად მართოს ქვეყანა და რომლის მთავარი მოტივაციაც თავისი ფინანსების შენარჩუნებაა.