ცოტა ხნის წინ სირიაში მიწისძვრის შედეგად განადგურებული სახლის ნანგრევებში ახალდაბადებული ჩვილი იპოვეს, რომელიც ჭიპლარით ისევ დედის სხეულს იყო დაკავშირებული. სამწუხაროდ, ბავშვის დედა, მამა და ოთხი დედმამიშვილი ნანგრევებში გარდაცვლილები იპოვეს.

პოვნისთანავე ჩვილის ჭიპლარი გადაჭრეს და სასწრაფოდ საავადმყოფოში გადაიყვანეს გადასარჩენად. ჩვილს სხეულზე დაზიანებები აღენიშნებოდა და სუნთქვა უჭირდა, თუმცა ექიმებმა მისი დახმარება დროულად შეძლეს და ახლა ჩვილის მდგომარეობა სტაბილურია.

ფოტო: Getty Images

გადარჩენილი ჩვილის შესახებ ინფორმაცია სოციალურ ქსელებში ვირუსულად გავრცელდა, კომენტარებში კი ათასობით ადამიანმა მისი შვილად აყვანის სურვილი გამოთქვა. "მინდა, მასზე ვიზრუნო და ვიშვილო, თუ კანონიერი პროცედურები ამის საშუალებას მომცემს", — წერს ერთ-ერთი ტელეწამყვანი. "მინდა, ვიშვილო და ღირსეული ცხოვრება მივცე", — ვკითხულობთ კომენტარებში.

საავადმყოფოს მენეჯერი და ექიმი, ხალიდ ატია ამბობს, რომ კლინიკაში ყოველდღიურად ათასობით ადამიანი რეკავს, რომლებსაც სურთ ჩვილი იშვილონ. "ჯერჯერობით არავის მივცემ მისი შვილად აყვანის უფლებას. ვიდრე მას ახლობლები მოაკითხავენ, საკუთარი შვილივით მოვუვლი", —განაცხადა ექიმმა.

შეგახსენეთ, რომ თურქეთსა და სირიაში მიწისძვრის შედეგად გარდაცვლილთა რიცხვმა 21 ათასს გადააჭარბა.