ამის შესახებ ხატია დეკანოიძემ ჟურნალისტებთან საუბრისას განაცხადა.

რატომ არის მნიშვნელოვანი: ლევან ხაბეიშვილი ენმ-ის თავმჯდომარე გუშინ გახდა და 1 დღეში პარტიის არაერთმა წევრმა თანამდებობა დატოვა.

  • მათ შორის, არიან პოლიტსაბჭოს თავმჯდომარე, პოლიტიკური მდივანი, ბათუმის ორგანიზაციის ხელმძღვანელი.
  • ნაწილი ამბობს, რომ მხოლოდ პოსტს ტოვებს ნაციონალურ მოძრაობაში რჩება და ბრძოლას აგრძელებს.

დეტალები: ხატია დეკანოიძის თქმით, გეგმავს, შესაბამისი განცხადებით პარლამენტის თავმჯდომარეს მიმართოს.

  • "ვაპირებ, დავტოვო საპარლამენტო ფრაქციის თავმჯდომარის პოსტი და შემდეგ უკვე მივიღოთ ის გადაწყვეტილება, რომელიც მე ვფიქრობ, რომ რეალურად არის პოპულისტური, მაგრამ საზიანო პარტიისთვის", — განაცხადა მან.
  • ხოლო TV პირველთან ინტერვიუში აღნიშნა, რომ რჩება ფრაქციაშიც და პარტიაშიც.
  • "არ ვაპირებ, რომ სადმე წავიდე, არ ვაპირებ, რომ რაიმე ბრძოლის ველი ან თუნდაც ერთი პატარა ნაკუწი მაინც დავთმო", — განაცხადა მან.

გარდა ამისა, TV პირველის ეთერში ის გამოეხმაურა ლევან ხაბეიშვილის დღევანდელ განცხადებასაც — პარტიის ახალმა თავმჯდომარემ აღნიშნა, რომ სააკაშვილის გათავისუფლების სანაცვლოდ ენმ დატოვებს პარლამენტს, საკრებულოებს და ცენტრალურ ოფისს გაუფორმებენ ბიძინა ივანიშვილს.

  • დეკანოიძე მიიჩნევს, რომ ზედმეტი პოპულიზმი დამაზიანებელია არამხოლოდ პარტიისთვის, არამედ ქვეყნისთვის.
  • "მე ვფიქრობ, რომ განსაკუთრებით ამ მძიმე მდგომარეობის დროს, როცა პარტიაში არის ძალიან ბევრი ცვლილებები ძალიან ფრთხილად უნდა ვიყოთ პოპულისტურ განცხადებებთან", — აღნიშნა მან.
  • "მე ვფიქრობ, რომ თუ პარლამენტს დავტოვებთ, საკრებულოებს დავტოვებთ, თუ დავიხურავთ ქუდს და მარტო ქუჩაში გავალთ, ამით მხოლოდ და მხოლოდ ოცნება გაიხარებს, ამიტომ არ მგონია ეს სწორი განცხადება", — განაცხადა ენმ-ის დეპუტატმა.
  • მისივე განმარტებით, გადადგომაზე გადაწყვეტილება ამ განცხადებასთან პირდაპირ კავშირში არ არის და ამაზე დიდი ხანი ფიქრობდა.