ტელეკომპანია რუსთავი 2-ის წამყვანი, ნანუკა ჟორჟოლიანი ფეისბუკის პირად გვერდზე გამოქვეყნებული პოსტით ფაქტობრივად ადასტურებს, რომ ნიკა გვარამიამ ტელეკომპანიის დირექტორის პოსტი დატოვა.

"მადლობა შეუპოვრობისთვის, ამ 5 წლისთვის. მადლობა, რომ იბრძოლე არხისთვის ისე, როგორც არ უბრძოლია არცერთ დირექტორს. მადლობა ჩემი, როგორც წამყვანის თავისუფლებისთვის. წარმატებებს გისურვებ იქ, სადაც იქნები ხვალ. დარწმუნებული ვარ, შენი წარსულიდან, ეს არხი ყველაზე მეტად გეყვარება", - წერს ნანუკა ჟორჟოლიანი.

8 ივნისს საღამოს გავრცელდა ინფორმაცია, რომ ნიკა გვარამიამ თანამდებობა დატოვა, თუმცა, ოფიციალურად ეს ფაქტი ჯერ არც დამფუძნებლებს დაუდასტურებიათ და არც გვარამიას.

On.ge-ს ინფორმაციით, ყადაღისა და დროში გაწელილი სასამართლო პროცესების გამო, არხს აქვს ფინანსური პრობლემები, რაც შეიძლება გამხდარიყო გვარამიას მიერ თანამდებობის დატოვების ერთ-ერთი მიზეზი. On.ge კვლავ ცდილობს გვარამიას გადადგომის შესახებ დამატებითი ინფორმაციის მოძიებას.