ამერიკის შეერთებულ შტატებში დაკავებული ქართველი მოკრივის, ლევან მაყაშვილის ადვოკატი, ლევან ნატროშვილი ამბობს, რომ მისი დაცვის ქვეშ მყოფი შეცდომით დააკავეს.

"ის არის სრულიად უდანაშაულო, როგორც აცხადებს და უბრალოდ, მოხდა ისე, რომ ძალიან ბევრი პირი დააკავეს და ლევანიც მოყვა. სასამართლოს ლევანის გამშვების პრობლემა არ აქვს, უშვებენ დღეს ან ხვალე," - ამბობს მაყაშვილის ადვოკატი რუსთავი 2-თან მიცემულ ინტერვიუში.

ამრიკაში დაკავებული კიდევ ერთი მოკრივის, ავთანდილ ხურციძის მეგობარი კი, ავრცელებს ინფორმაციას, რომ შესაძლოა ქართველი მოკრივეების გათავისუფლებაზე სასამართლომ დღეს იმსჯელოს.

"სანამ ყველაფერი გაირკვევა საჭიროა ოთხი ადამიანის თავდებში ჩაუდგეს. ეს ოთხი ადამიანი ლეგალურად უნდა იყოს ამერიკაში და კარგი სამსახურით, სანამ ყველაფერი დაზუსტდება," - ამბობს მერაბ დვალიშვილი, დაკავებული ავთანდილ ხურციძის მეგობარი.

რეკეტი, გამოძალვა, თაღლითობა, დაქირავებული ქილერობა, კონტრაბანდა, იარაღის უკანონო შენახვა-ტარება და ძარცვა - ეს არის იმ ბრალდებების არასრული სია, რაც ნიუ-იორკის პროკურატურამ კრიმინალური დაჯგუფების წევრებს წაუყენა. ამერიკელი სამართალდამცავები ამ დაჯგუფებას რუსულ-ქართულ კრიმინალურ სინდიკატად მოიხსენიებენ, დაკავებულთა უმრავლესობა კი ნიუ-იორკში, ბრუკლინში ცხოვრობდა.