კოლინ ჰუვერის ბესტსელერი რომანი ყველაფერი მთავრდება ჩვენით, რომელიც ქართულ ენაზეც ნათარგმნია, მალე ფილმად იქცევა, მთავარ როლებში კი ისეთ ცნობილ სახეებს ვნახავთ, როგორიც ბლეიკ ლაივლი და ჯასტინ ბალდონია. წიგნის ეკრანულ ადაპტაციაზე Sony Pictures ზრუნავს, თუმცა ჯასტინ ბალდონის კომპანია Wayfarer Studios თანადამფინანსებელია, ხოლო ჯასტინი — მსახიობთან ერთად ფილმის რეჟისორი და პროდიუსერიც. ფილმის აღმასრულებელი პროდიუსერები ასევე იქნებიან თავად წიგნის ავტორი, კოლინ ჰუვერი, და ბლეიკ ლაივლი.

ფოტო: Getty

ფოტო: Getty Images

ჰუვერი ამჟამად ყველაზე მაღალანაზღაურებადი მწერალია აშშ-ში — წინა წლის ტოპ 10 ბესტსელერიდან 5 სწორედ მას ეკუთვნოდა; ხოლო ყველაფერი მთავრდება ჩვენით New York Times-ის ბესტსელერების სიას 90 კვირის განმავლობაში არ ტოვებდა. ჰუვერი ფილმის გადაღების პროცესშიც აქტიურადაა ჩართული და მას ხშირად მიმართავენ რჩევებისთვის.

ფოტო: გამომცემლობა პალიტრა L

ბლეიკ ლაივლი, რომელიც ცნობილი გახდა ფილმით The Sisterhood of the Traveling Pants და სერიალით Gossip Girl, ამჟამად პროდიუსერის ამპლუაშიც მოსინჯავს ძალებს, ხოლო ჯასტინ ბალდონი, რომელიც მაყურებელმა სერიალით Jane the Virgin გაიცნო, თანადამფუძნებელია კომპანიის Wayfarer Studios, რომლის მიზანია, "შექმნას ისეთი ფილმები და სერიალები, რომლებიც ადამიანის სულს ესაუბრება და აძლიერებს".