ტიმოთი შალამეს გამო ჰოლივუდში არსებული ნეპოტიზმის შესახებ დებატები მას შემდეგ განახლდა, რაც მსახიობის აგენტმა განაცხადა, რომ შალამე ბოლო 7 წლის განმავლობაში კასტინგზე არც ერთხელ ყოფილა. აგენტმა ეს განცხადება ბოლოდროინდელ ჭორზე პასუხად გააკეთა, რომლის მიხედვითაც, შალამემ Gladiator 2-ში მთავარი როლის მისაღებად კასტინგი გაიარა.

"ვიცი, რომ ერთ-ერთი მსახიობი, რომელიც ბოლო რამდენიმე თვის განმავლობაში ფილმის გადაღებებზე შუა აღმოსავლეთში იმყოფებოდა, 7 წელია, კასტინგზე არ გასულა", — დაწერა ტვიტერზე ტიმოთის აგენტმა, ბრაიან სვარდსტრომმა. პოსტის გამოქვეყნებიდან მალევე ჰოლივუდში არსებული ნეპოტიზმის შესახებ ცხარე დებატები დაიწყო. ტვიტერის ზოგიერთი მომხმარებელი ტიმოთი შალამეს ოჯახითა და კავშირებით დაინტერესდა.

ფოტო: Getty Images

ტიმოთის ბიძა — როდმენ ფლენდერი რეჟისორია, ხოლო დედა — ნიკოლ ფლენდერი მსახიობია, რომელიც The Bird Watcher-სა და In The Heat Of Passion-ში მონაწილეობდა. ტიმოთის და, პოლინ შალამეც ახალგაზრდა მსახიობია, რომელმაც სხვადასხვა ფილმსა და სერიალში უკვე მიიღო მონაწილეობა. ტვიტერის ზოგიერთი მომხმარებლის აზრით, ის ფაქტი, რომ ტიმოთის 7 წელია, კასტინგში მონაწილეობა არ მიუღია, მისი პრივილეგიების დასტურია.

"შალამე "ნეპოტიზმის შვილია", მაგრამ ეს ბევრმა არ იცის. კინოინდუსტრიაში ბიძა ჰყავს, რომელიც ბევრ კარს უხსნის", — წერს ტვიტერის ერთ-ერთ მომხმარებელი. ტიმოთის ბევრმა ფანმა კი მსახიობი დაიცვა და ნეპოტიზმთან დაკავშირებულ ბრალდებებს დაუპირისპირდა.

ფოტო: Warner Bros. Pictures

"ტიმოთი შალამე 7 წლის განმავლობაში კასტინგზე არ ყოფილა, რადგან ის უბრალოდ ნიჭიერი და მოთხოვნადია, აქ შეთქმულების ძიება არ არის საჭირო. გთხოვთ, იმ ადამიანებმა საუბარი შეწყვიტოთ, რომლებმაც არც კი იცით, კინოინდუსტრია როგორ მუშაობს", — წერს ტვიტერზე ტიმოთის ფანი.

შეგახსენებთ, რომ ტიმოთი შალამე განსაკუთრებით პოპულარული Call Me by Your Name-ში შესრულებული როლით გახდა. შალამემ ზენდეიასთან ერთად Dune-ის პირველ ნაწილშიც მიიღო მონაწილეობა. მსახიობს Dune-ის მეორე ნაწილშიც ვიხილავთ, რომლის პრემიერაც 2023 წლის 3 ნოემბერს იგეგმება.