როგორც მოსალოდნელი იყო, რუსეთმა არ შეასრულა პირობა, რომლის მიცემა, უკრაინას არც კი უთხოვია — ცეცხლის შეწყვეტის ნაცვლად, სროლები გაგრძელდა.

რატომ არის მნიშვნელოვანი: 12 დეკემბერს უკრაინის პრეზიდენტმა რუსეთს მოუწოდა, შობის დღეს ჯარების გაყვანა დაეწყო და აგრესიაზე უარის თქმის უნარი ეჩვენებინა, თუმცა რუსეთის პრეზიდენტის პრესმდივანმა თქვა, რომ ამაზე საუბარი გამორიცხულია.

• 5 იანვარს, ვლადიმერ პუტინის თანამოაზრე, რუსეთის პატრიარქი კირილი "საშობაო ზავის" ინიციატივით გამოვიდა და "კონფლიქტში ჩართულ მხარეებს" მოუწოდა, 6 იანვრის 12 საათიდან 7 იანვრის 24 საათამდე ცეცხლი შეწყვიტათ.
• კირილის განცხადებას უკრაინის პრეზიდენტის უფროსის მრჩეველმა ცინიკური ხაფანგი და პროპაგანდის ელემენტი უწოდა.
• 6 იანვარს პუტინმა ზუსტად კირილის "მოწოდების" შესაბამისი დროებით, 36 საათით ცეცხლის შეწყვეტის განკარგულება გასცა.
• გუშინ რუსეთი ამტკიცებდა, თითქოს შეთანხმება ამოქმედდა და სროლა შეწყდა.

დეტალები: თუმცა ე.წ. ზავის პირველივე დღეს მთელი უკრაინის ტერიტორიაზე საჰაერო განგაში გამოცხადდა და ცაში რუსული ავიაგამანადგურებლები გამოჩნდნენ.

• უკრაინის პრეზიდენტის ადმინისტრაციის განცხადებით, 6 იანვარს დაიბომბა ხერსონის სახანძრო სადგური, რასაც 1 მაშველის სიცოცხლე ემსხვერპლა.
• დღეს ცნობილი გახდა, რომ შობის ღამეს ხერსონი 39-ჯერ დაიბომბა, რის შედეგადაც 7 ადამიანი დაშავდა.
• სამხედრო ადმინისტრაციის ცნობით, გუშინ სუმის ოლქი არტილერიიდან ორჯერ დაიბომბა.
• დონეცკის ოლქში კი სამოქალაქო ობიექტების დაბომბვას 2 ადამიანი ემსხვერპლა, ხოლო 7 დაშავდა.
• ლუგანსკის ოლქის ხელმძღვანელიც აცხადებს, რომ სროლა და თავდასხმები არ შეწყვეტილა.
• გენერალური შტაბის დღევანდელი მონაცემებით, რუსების შეტევა 14 დასახლებულ პუნქტში მოიგერიეს.

პენტაგონი ადასტურებს, რომ რუსეთმა შეთანხმება დაარღვია და ბრძოლა გაგრძელდა.

• თავდაცვის მინისტრის მოადგილემ განაცხადა, რომ პუტინის სიტყვებს სკეპტიკურად უნდა მიუდგნენ, რადგან თავის დროზე ის იმასაც ამტიცებდა, რომ უკრაინაში არ შეიჭრებოდა.
• სახელმწიფო დეპარტამენტის პრესსპიკერმა კი განაცხადა, რომ ცეცხლის შეწყვეტის მოლოდინი თავიდანვე არ ჰქონდათ და ეს 6 იანვრის მოვლენებმა დაადასტურა.

რუსეთი კი შეთანხმების დარღვევაში უკრაინას ადანაშაულებს.

• პროპაგანდისტული საშუალებები ამტკიცებენ, თითქოს "ზავი", რომელზეც უკრაინას თანხმობა არ მიუცია, პირველივე საათებში დაარღვიეს.
• გუშინ უკრაინის პრეზიდენტის ადმინისტრაციის წარმომადგენელმა პირდაპირ განაცხადა, რომ ზავზე მხოლოდ მაშინ ილაპარაკებენ, როცა უკანასკნელი ოკუპანტი გავა ქვეყნიდან და მანამდე "არანაირი ზავი არ იქნება, იქნება მხოლოდ HIMARS თქვენს თავებზე".

საერთაშორისო თანამეგობრობა რუსეთის განცხადებას თავიდანვე კრიტიკულად უყურებდა. აშშ-ის პრეზიდენტმა, ჯო ბაიდენმა განაცხადა, რომ ეს "ზავი" პუტინს თავისთვის სურდა და 10-თვიანი ომისა და დიდი დანაკარგების შემდეგ ამოისუნთქვას ცდილობდა.

• ნედ პრაისი: "ეს მეტწილად ცინიკურია, რადგან (პუტინის განცხადება) გაჩნდა მხოლოდ რამდენიმე დღის შემდეგ, რაც მოსკოვმა განახორციელა საახალწლო თავდასხმები უკრაინის სამოქალაქო ინფრასტრუქტურაზე".
• შარლ მიშელი: "ცალმხრივი წესით ცეცხლის შეწყვეტის გამოცხადება ისეთივე სიყალბე და ფარისევლობაა, როგორც აბსურდული, უკანონო ანექსიების დაწყება და მათთან დაკავშირებული რეფერენდუმები".
• ლიეტუვის თავდაცვის მინისტრი: "მკვლელები დაიღალენ და ერთი დღით შესვენება სურთ. მათ სურთ საშობაო ზავი, რომ განახლებული ძალებით შეძლონ უკრაინელების დახოვა".
• დიდი ბრიტანეთის საგარეო საქმეთა მინისტრი: "რუსეთის თავდასხმების 36-საათიანი პაუზა არანაირად არ შეუწყობს ხელს მშვიდობის პერსპექტივას. რუსეთმა სამუდამოდ უნდა გაიყვანოს თავისი ჯარები, დათმოს უკანონო კონტროლი უკრაინის ტერიტორიაზე და შეაჩეროს ბარბაროსული თავდასხმები".
• გერმანიის საგარეო საქმეთა მინისტრი: პუტინის სურვილი შობაზე შეწყვიტოს ცეცხლი, არ მიუთითებს მის სურვილზე, დაასრულოს ომი.