ახალგაზრდა ამერიკელი მსახიობი ნოა შნაპი, რომელიც მაყურებელმა ნეტფლიქსის გახმაურებული სერიალიდან Stranger Things გაიცნო, ცოტა ხნის წინ გეიდ დაქამინგაუთდა. შნაპმა ტიკტოკზე ვიდეო გამოაქვეყნა, რომელშიც იგი ახლობელ ადამიანებთან თავისი ქამინგ აუთის გამოცდილებაზეც ჰყვება.

"როცა შიშში 18-წლიანი ცხოვრების შემდეგ, როგორც იქნა, ჩემს მეგობრებსა და ოჯახს ვუთხარი, რომ გეი ვარ, მათ კი მხოლოდ ის მიპასუხეს, ვიცითო", — წერს მსახიობი და პირს აყოლებს ტიკტოკის 'საუნდს': "იცი, რა არ ყოფილა ეს? ასეთი სერიოზული ამბავიც. ასეთი სერიოზული ამბავი არასდროს ყოფილა ეს. ალალად ვამბობ, სერიოზული ამბავი არც არასდროს იქნება".

@noahschnapp

I guess I’m more similar to will than I thought

♬ original sound - princessazula0

შნაპმა ვიდეოს აღწერაში ასევე აღნიშნა, ალბათ უილს იმაზე მეტად ვგავარ, ვიდრე მეგონაო.

უილი, რა თქმა უნდა, მისი ყველაზე ცნობილი როლია — Stranger Things-ის ერთ-ერთი მთავარი გმირი. საქმე კი ისაა, რომ სერიალის გულშემატკივრები დიდი ხნის განმავლობაში ვარაუდობდნენ უილ ბაიერსის სექსუალურ ორიენტაციას. საბოლოოდ, ამ თეორიას თავად მსახიობიც გამოეხმაურა გასულ ზაფხულს; შნაპმა დაადასტურა, რომ უილი გეია და მას თავისი საუკეთესო მეგობარი, მაიკი, უყვარს.

"უილი თავს შეცდომად მიიჩნევს და ჰგონია, რომ მისი ადგილი არსადაა", — განაცხადა მაშინ ნოამ, — "იგი ყოველთვის ასე გრძნობდა თავს; მის ყველა მეგობარს ხომ შეყვარებული ჰყავდა და საკუთარი ადგილი ჰქონდა. უილმა კი თავისი ადგილი ვერსად იპოვა. ალბათ სწორედ ამიტომ, უამრავი ადამიანი მეუბნება, რომ უილთან თავს აიგივებს".

ძმები დაფერების ცნობილი სერიალის Stranger Things-ის მეოთხე სეზონის ბოლო სერიები მაყურებელმა 2022 წლის ზაფხულში იხილა. გასულ წელსვე დადასტურდა, რომ პროექტი მეხუთე სეზონით დასრულდებოდა.