5 ივნისს, 19:00 საათზე, ილიას სახელმწიფო უნივერსიტეტის წიგნის სახლ ლიგამუსში დაჯილდოვების ცერემონიალი გაიმართა. ილიაუნის ლიტერატურული კონკურსის - საუკეთესო ქართული რომანის გამარჯვებული არჩილ ქიქოძე გახდა, რომანით: სამხრეთული სპილო.

კონკურსის გამარჯვებული, არჩილ ქიქოძე, საქართველოში ყველაზე დიდი ლიტერატურული პრემიით - 10 ათასი ლარით დაჯილდოვდა.

ილიაუნის ლიტერატურულ კონკურსზე წელს 12 ქართული რომანი იყო წარდგენილი.

განსახილველი რომანების სრული სია:

  • აბო იაშაღაშილი, ძველი ტფილისის დამნაშავენი - გამომცემლობა ქოლგა
  • არჩილ ქიქოძე, სამხრეთული სპილო - ბაკურ სულაკაურის გამომცემლობა
  • ცოტნე ცხვედიანი, მაიაკოვსკის თეატრი - ბაკურ სულაკაურის გამომცემლობა
  • ლაშა მილორავა, ორი ხორცი - ბაკურ სულაკაურის გამომცემლობა
  • ალეკო შუღლაძე, გადამალვა - გამომცემლობა დიოგენე
  • თამარ თანდაშვილი, სტაფილოსფერი ბაბუაწვერას ქარბუქი - გამომცემლობა სიესტა
  • ალექსანდრე ვაჭარაძე, ირინოლა - ავტორი
  • გურამ გეგეშიძე, ნათლისქრობა - გამომცემლობა ინტელექტი
  • რეზო თაბუკაშვილი, 13 დღე - გამომცემლობა ინტელექტი
  • ტორესა მოსი, იყო - გამომცემლობა ინტელექტი
  • თამარ სუბელიანი მდინარეს თევზები შეჭამენ - გამომცემლობა წიგნები ბათუმში
  • თამარ ფოლადაშვილი, სიკვდილის ახსნა - გამომცემლობა წიგნები ბათუმში

2016 წლის საუკეთესო ქართული რომანი გამოავლინა ჟიურიმ, რომლებიც ილიას სახელმწიფო უნივერსიტეტის პროფესორებისა და სტუდენტებსგან შედგებოდა და რომელთა ვინაობაც დაჯილდოვების ცერემონიალამდე კონფიდენციალური იყო.

ილიაუნის ლიტერატურულ კონკურსს უკვე შვიდწლიანი ისტორია აქვს. 2010 წელს უნივერსიტეტის აკადემიურმა საბჭომ გადაწყვიტა, ხელი შეეწყო რომანის განვითარებისათვის საქართველოში და დააარსა პრემია საუკეთესო რომანისთვის.

პრემია 2014 წლამდე ხუთ ნომინანტზე გაიცა.

  • 2010 წელი - აკა მორჩილაძე, რომანისთვის მამლუქი,
  • 2011 წელი - ზაზა ბურჭულაძემ, გასაბერი ანგელოზი.
  • 2012 წელს პრემია არ გაცემულა,
  • 2013 წელს პრემია გაიყვეს ანა კორძაია-სამადაშვილმა, რომანისთვის ვინ მოკლა ჩაიკა და ჯაბა ზარქუამ, რომანისთვის მკითხველი უნდა მოკვდეს.
  • 2015 წელს ილიაუნის პრემია გადაეცა ნანა ექვთიმიშვილს, რომანისთვის მსხლების მინდორი.