ირანელმა მოჭადრაკე სარა ხადემმა ყაზახეთის ქალაქ ალმატიში მიმდინარე საერთაშორისო ტურნირზე ჰიჯაბის გარეშე იასპარეზა. ახლახან გავრცელებული ინფორმაციით, მოჭადრაკე ირანში დაბრუნებას აღარ აპირებს და ის ქმარ-შვილთან ერთად საცხოვრებლად ესპანეთში გადადის. ჯერჯერობით უცნობია ოჯახს უკვე მიღებული აქვს ესპანეთში ბინადრობის უფლება, თუ თავშესაფრის მოთხოვნას აპირებს.

სარა ხადემი იმ ირანელ სპორტსმენთაგან ერთ-ერთია, რომელიც ქვეყანაში მიმდინარე საპროტესტო გამოსვლებისადმი სოლიდარობის ნიშნად საერთაშორისო ტურნირზე ჰიჯაბის გარეშე გამოჩნდა.

ფოტო: Getty Images

შეგახსენებთ, რომ 22 წლის ირანელი ქალის, მაჰსა ამინის გარდაცვალებას ქვეყანაში, შემდეგ კი მსოფლიოში საპროტესტო აქციები მოჰყვა. მაჰსა ამინი ე.წ. მორალის პოლიციამ "ჰიჯაბის ტარების წესის დარღვევისთვის" 13 სექტემბერს დააპატიმრა. თვითმხილველების თქმით, პოლიციის მანქანაში ჩასმის შემდეგ მაჰსას ფიზიკურად გაუსწორდნენ, მოგვიანებით კი ქალი გარდაიცვალა.

სწორედ ამ ფაქტის შემდეგ ირანში საპროტესტო აქციები დაიწყო. აქციაზე ირანელმა ქალებმა ჰიჯაბები დაწვეს და 22 წლის ქალის გარდაცვალება ამ ფორმითაც გააპროტესტეს. საპროტესტო ტალღას მსოფლიოს არაერთი ქვეყანა შეუერთდა.

ცოტა ხნის წინ ირანში მორალის პოლიციის საქმიანობა შეჩერდა. შეგახსენებთ, რომ მორალის პოლიციას ქვეყანაში სამოსის ისლამური წესით ტარების კონტროლი ევალებოდა. ირანის გენერალური პროკურორის, მოჰამად ჯაფარ მონტაზერის განცხადებით, მთავრობამ შესაძლოა გადახედოს კანონს, რომელიც ირანელ ქალებს ჰიჯაბის ტარებას ავალდებულებს.

ირანში ჰიჯაბის ტარება ყველა ქალისთვის სავალდებულო 1983 წლის აპრილში გახდა.