22 წლის ირანელი ქალის, მაჰსა ამინის გარდაცვალებას ქვეყანაში საპროტესტო აქციები მოჰყვა. მაჰსა ამინი, ე.წ. მორალის პოლიციამ "ჰიჯაბის ტარების წესის დარღვევისთვის" 13 სექტემბერს დააპატიმრა. თვითმხილველების თქმით, პოლიციის მანქანაში ჩასმის შემდეგ მაჰსას ფიზიკურად გაუსწორდნენ, მოგვიანებით კი ქალი გარდაიცვალა.

ამ ფაქტის შემდეგ ირანში საპროტესტო აქციები გრძელდება. ქალაქ სარში პროტესტის მონაწილე ქალებმა ჰიჯაბები მოიხსნეს და კოცონზე საჯაროდ დაწვეს. აქტივისტების თქმით, ირანის პოლიციამ აქციის მონაწილე ორი კაცი სასიკვდილოდ დაჭრა. საერთო ჯამში, პროტესტის დაწყებიდან დღემდე ადგილობრივმა პოლიციამ 6 ადამიანი მოკლა, უფრო მეტი კი დააკავა.

შეგახსენებთ, რომ "ჰიჯაბის არასწორად ტარებისთვის" მოკლული ამინი დაკავებისას ოჯახთან ერთად თეირანში ნათესავების მოსანახულებლად მიემგზავრებოდა. პოლიციამ ის მანქანაში ძალით ჩასვა, მის ძმას, რომელმაც მათი შეჩერება სცადა, კი უთხრეს, რომ მაჰსას ჩაცმულობის შესახებ "ერთსაათიან გაკვეთილს" ჩაუტარებდნენ, შემდეგ კი გაათავისუფლებდნენ.

მაჰსას ძმა მას პოლიციის განყოფილების წინ ელოდებოდა, როცა შენობასთან სასწრაფოს მანქანა მოვიდა. ოჯახს უთხრეს, რომ მაჰსას გულის შეტევა დაემართა და კომაში ჩავარდა. მაჰსა 16 სექტემბერს გარდაიცვალა. მაჰსას ოჯახის წევრების თქმით, ქალს დაკავებამდე ჯანმრთელობის პრობლემები არ ჰქონია.

ასევე იხილეთ: