წლის ბოლო, როგორც წესი, შეჯამებების დროა. დეკემბრის მიწურულს ვიგებთ ხოლმე, რას უსმენდნენ, უყურებდნენ და კითხულობდნენ ბოლო 12 თვის განმავლობაში ყველაზე ხშირად. საინტერესოა ისიც, რომელ წიგნებს ანიჭებდნენ უპირატესობას ქართველი მკითხველები 2022-ში. ელექტრონული წიგნების აპლიკაციაში საბა წლის 10 ყველაზე პოპულარული წიგნის ჩამონათვალია განთავსებული.

10. შარლოტა ბრონტეს მასწავლებელი (აუდიოწიგნი)

მასწავლებელი ინგლისელი კლასიკოსის, შარლოტა ბრონტეს, პირველი რომანია, რომელიც მსოფლიოში მასზე ბევრად სახელგანთქმულ ჯეინ ეარამდე დაიწერა. თუმცა, წიგნის გამოცემაზე უარი არაერთმა გამომცემლობამ თქვა; საბოლოოდ კი, მასწავლებელმა დღის სინათლე მხოლოდ ავტორის გარდაცვალების შემდეგ, 1857 წელს, იხილა.

9. რიუნოსკე აკუტაგავას ხელოვნებით შეპყრობილი (აუდიოწიგნი)

იაპონური მოთხრობის ფუძემდებლად მიჩნეულმა რიუნოსკე აკუტაგავამ ხანმოკლე ცხოვრების მიუხედავად მდიდარი ლიტერატურული მემკვიდრეობა დატოვა. ავტორის შემოქმედება 150-ზე მეტ მოთხრობას მოიცავს. ერთ-ერთი მათგანი კი, ხელოვნებით შეპყრობილი, რომელიც საბას ათეულშიც მოხვდა, გამომცემლობა პალიტრა L-მა გამოსცა სერიაში ერთი მოთხრობა.

8. ეკჰარტ ტოლეს აწმყოს ძალა (აუდიოწიგნი)

გერმანელი მენტორისა და ავტორის ეს წიგნი ჯერ კიდევ წინა საუკუნის მიწურულს გამოიცა, თუმცა, დღემდე პოპულარულ საკითხავად რჩება. თავის დროზე წიგნს რეკომენდაცია გაუწია ცნობილმა ამერიკელმა ტელეწამყვანმა ოპრა უინფრიმაც, რის შემდეგაც აწმყოს ძალა The New York Times-ის ბესტსელერი გახდა, ითარგმნა 33 ენაზე და მილიონობით ეგზემპლარად გამოიცა მსოფლიოში.

7. თინათინ ბერიძის მეორე შანსი

თანამედროვე ქართველი ავტორის გამოჩენა ამ სიაში ნამდვილად სასიხარულოა. თინათინ ბერიძე პროექტის გახდი ბესტსელერის ავტორი გამარჯვებულია, რომლის სადებიუტო რომანი, მოპარული სიყვარული, მართლაც იქცა ბესტსელერად. ბესტსელერი გახდა მისი გაგრძელებაც, მეორე შანსი, რომელიც წელს გამოიცა.

6. ნათია ჯაგოდნიშვილის შეცდომა

გახდი ბესტსელერის ავტორის გამარჯვებულია კიდევ ერთი ახალგაზრდა ქართველი ავტორი, ნათია ჯაგოდნიშვილი, რომელიც მოთხრობებს ადრეული ასაკიდანვე წერდა და აქვეყნებდა. შეცდომა ჯაგოდნიშვილის მეორე გამოცემული რომანია. მწერლის პირველი წიგნი — ცდუნება — თავის დროზე ასევე გახდა ბესტსელერი.

5. ჰექტორ გარსიას და ფრანსესკ მირალესის იკიგაი (აუდიოწიგნი)

აწმყოს ძალის შემდეგ, ეს ამ სიაში კიდევ ერთი წიგნია, რომელიც ეგრეთ წოდებულ თვითგანვითარების კატეგორიას განეკუთვნება. იკიგაი იაპონური კონცეფციაა, რომელიც, როგორც ამბობენ, ადამიანებს ცხოვრებისეული მიზნის ჩამოყალიბებაში ეხმარება. ამ წიგნში მისი სხვადასხვა ტექნიკაა მოცემული.

4. ჯორჯ მარტინის ცეცხლი და სისხლი

ამერიკელ ტოლკინად წოდებული ფანტასტი ავტორის ამ რომანს ქართველი მკითხველი განსაკუთრებულად ელოდებოდა. ამდენად, სიაში მისი დანახვა გასაკვირი არაა. წიგნში მოქმედება მარტინის მკითხველებისთვის კარგად ნაცნობი ვესტეროსის შვიდი სამეფოს სამყაროში ხდება და ტარგარიენების საგვარეულოს ამბავს მოგვითხრობს.

3. ჰექტორ გარსიას და ფრანსესკ მირალესის იკიგაი

არა, შეცდომა ნამდვილად არაა. უბრალოდ, ათეულში ამ წიგნის ორი ვერსია მოხვდა — ელექტრონული და აუდიო.

2. ჯორდან პეტერსონის ცხოვრების 12 წესი (აუდიოწიგნი)

თვითგანვითარების კატეგორიას ეკუთვნის კანადელი ფსიქოლოგის ეს წიგნიც. არაერთი საკამათო და პროვოკაციული განცხადებით ცნობილი ავტორის ტექსტი მკითხველს მნიშვნელოვანი ცხოვრებისეული რჩევების მიცემას ჰპირდება.

1. ჯორჯ ორუელის ცხოველების ფერმა (ინგლისურენოვანი აუდიოწიგნი)

არც ცნობილ ინგლისელ მწერალს და არც მის ამ ნაწარმოებს განსაკუთრებული წარდგენა ალბათ არ სჭირდებათ. სატირულ-ალეგორიული ტექსტი რომ საბჭოეთის ერთგვარი ანარეკლია, ეგეც არაა მაინცდამაინც უცნობი ფაქტი. თუმცა, საინტერესო ისაა, რომ საბას ათეულის სათავეში ამ წიგნის ინგლისურენოვანი ვერსია აღმოჩნდა — პლატფორმიდან წელს ის თითქმის 1300-ჯერ ჩამოტვირთეს.