საქსტატის მონაცემებით, 2017 წლის პირველ კვარტალში, წინა წლის იმავე პერიოდთან შედარებით, ბიზნეს სექტორის ბრუნვის მოცულობა 19,1 პროცენტით გაიზარდა. წელს ეს მაჩვენებელი 15,2 მილიარდ ლარს გაუტოლდა.

ფოტო: საქსტატი

როგორც უწყებაში აღნიშნავენ, ზრდის ტენდენციაა ბიზნეს სექტორის პროდუქციის გამოშვების მაჩვენებელიც. მიმდინარე წლის პირველ კვარტალში პროდუქციის მაჩვენებელი 16,1 პროცენტით გაიზარდა და 7,5 მილიარდ ლარს გაუტოლდა.

ამავე პერიოდში მთლიანი ბრუნვის 48,1 პროცენტი მსხვილ ბიზნესზე მოდის, 21 პროცენტი - საშუალო, ხოლო 30,9 პროცენტი - მცირე ბიზნესზე ნაწილდება. რაც შეეხება პროდუქციის მთლიან გამოშვებას, მსხვილ ბიზნესზე 43,9 პროცენტი, საშუალოზე 24,6 პროცენტი და მცირე ბიზნესზე - 31,5 პროცენტი მოდის.

დასაქმებულთა მთლიანი რაოდენობის 36 პროცენტი მსხვილ ბიზნესზე მოდის, 22,1 პროცენტი - საშუალო, დარჩენილი 41,9 პროცენტი კი - მცირე ბიზნესზე. ამავე პერიოდში დაქირავებულთა მთლიან რაოდენობა 570,9 ათასი იყო. საქსტატის მონაცემებით, ეს მაჩვენებელი წინა წლის იმავე პერიოდს 5,5 პროცენტით აღემატება.

2017 წლის იანვარ-მარტში საშუალო თვიური ხელფასი ბიზნეს სექტორში 1 024 ლარი იყო, რაც კატეგორიების მიხედვით ასე გადანაწილდა: მსხვილი ბიზნესი – 1 155 ლარი, საშუალო ბიზნესი – 1 133 ლარი, მცირე ბიზნესი – 828 ლარი.