დეტალები: ინფორმაციას ამის შესახებ რუსთავი 2-ის დამფუძნებელი, დავით დვალი ავრცელებს.

• "სააპელაციო სასამართლომ უარი გვითხრა სარჩელის დაკმაყოფილებაზე და პირველი ინსტანციის გადაწყვეტილება ძალაში დატოვა. **** აღდგენილი სამართლიანობა!" — წერს დვალი.

რატომ არის მნიშვნელოვანი: დავით დვალმა და ჯარჯი აქიმიძემ ტელეკომპანია რუსთავი 2-ის წილის 60%-ის დასაბრუნებლად სასამართლოს 2019 წლის ოქტომბერში მიმართეს.

• ისინი აცხადებდნენ, რომ მას შემდეგ, რაც იძულებით დაათმობინეს მათივე დაფუძნებული კომპანიის 30-30%-იანი წილები, საკონტროლო პაკეტი პაატა კარსანიძემ შეიძინა, შემდეგ კი მისგან ქიბარ ხალვაშმა.
• 2020 წლის 17 იანვარს სასამართლომ განუხილველად დატოვა აქიმიძისა და დვალის სარჩელი, რომელიც ნასყიდობის ხელშეკრულების ბათილად ცნობას, საჯარო რეესტრში წილის რეგისტრაციის გაუქმებასა და წილის მესაკუთრედ ცნობას ეხებოდა.
• 2020 წლის 30 იანვარს კი აქიმიძე-დვალის სარჩელი სასამართლომ კვლავ წარმოებაში მიიღო და რუსთავი 2-ის ქონების 60%-ს ყადაღა დაედო.
• 2021 წლის დეკემბერში თბილისის საქალაქო სასამართლომ არ დააკმაყოფილა სარჩელი, რითიც ტელეკომპანია ქიბარ ხალვაშის საკუთრებაში დარჩა და რუსთავის 2-ის 60%-ს ყადაღა მოეხსნა.

რუსთავი 2-ის საქმე: 2004 წლის ზაფხულში, ხალვაშმა რუსთავი 2-ის 10%-იანი წილი ნიკა ტაბატაძისგან შეიძინა, 30%-იანი ეროსი კიწმარიშვილისგან და 60%-იანი პაატა კარსანიძისგან.

• არსებული ინფორმაციით, კარსანიძეს რუსთავი 2-ის საკონტროლო პაკეტი, მას შემდეგ ჩაუვარდა ხელში, რაც ხელისუფლების ზეწოლით, თავიანთი 30-30%-იანი წილები, ტელევიზიის დამფუძნებლებმა იძულებით გადაუფორმეს.
• ხალვაში ტელეკომპანიას ორი წლის მანძილზე მართავდა, 2006 წელს, სააკაშვილსა და ოქრუაშვილის შორის მომხდარი ცნობილი დაპირისპირების შემდეგ კი, მას სხვა ბიზნესებთან ერთად რუსთავი 2-ც ჩამოართვეს.
• საბოლოოდ, 2011 წელს, კომპანიის მფლობელები შპს საქართველო და ყარამანიშვილები გახდნენ.
• ხალვაშმა დავა ტელეკომპანიის დასაბრუნებლად 2015 წლის აგვისტოში წამოიწყო და ეს საქმე სამივე ინსტანციაში 20 თვეში მოიგო — უზენაესის საბოლოო გადაწყვეტილებით, არხი მას მიაკუთვნეს.

არქივიდან: 2016-2017 წლებში, საქართველოს სასამართლოებში გამარჯვების შემდეგ, ხალვაშმა განაცხადა, რომ ტელეკომპანიის 50%-ს, დავით დვალსა და ჯარჯი აქიმიძეს გადასცემდა, როგორც წინა ხელისუფლებისგან დაზარალებულ აქციონერებს. მან დვალს ტელეკომპანიის დირექტორობაც შესთავაზა.

• 2019 წელს სტრასბურგის სასამართლომ რუსთავი 2-ის საქმეზე დარღვევა არ დაადგინა და რუსთავი 2-ის 100%-იანი წილის მფლობელი ქიბარ ხალვაში გახდა.
• იმავე წელს ხალვაშმა დვალსა და აქიმიძეს რ2-ის 40% შესთავაზა, თუმცა თუმცა, დვალმა განაცხადა, რომ არ აპირებენ თანამონაწილეობას რ2-ის სახელმწიფო არხად გადაკეთების პროცესში.

გაიგეთ მეტი: როგორ იცვლებოდნენ რუსთავი 2-ის მფლობელები