თბილისის საქალაქო სასამართლოს პატიმრობაში მყოფი სააკაშვილის სასჯელის გადავადებაზე ან მისგან სრულად გათავისუფლებაზე უნდა ემსჯელა.

რატომ არის მნიშვნელოვანი: ბოლო პერიოდია, სააკაშვილის ოჯახის წევრები, ექიმები და ადვოკატები ექსპრეზიდენტის ჯანმრთელობის მდგომარეობის მკვეთრ გაუარესებაზე საუბრობენ და საზღვარგარეთ მის სამკურნალოდ გადაყვანას ითხოვენ.

• ყოფილი პრეზიდენტის ჯანმრთელობის მდგომარეობაზე ცენტრ ემპათიის დასკვნაში ნათქვამია, რომ "მოსალოდნელია კომა და სიკვდილი".
• სწორედ ჯანმრთელობის გაუარესების გამო სააკაშვილის სასამართლო პროცესი რამდენჯერმე გადაიდო.
• 9 დეკემბერს, სასამართლო სხდომის გადადებამდე მოსამართლე და ადვოკატები შეთანხმდნენ, რომ ყოფილი პრეზიდენტი დღევანდელ პროცესს დისტანციურად დაესწრებოდა.

დეტალები: მომდევნო სხდომის თარიღად 22 დეკემბრის 11სთ განისაზღვრა.

• მანამდე, პენიტენციურმა სამსახურმა პროცესზე სააკაშვილის დისტანციურად ჩართვაზე უარი თქვა.
• სხდომის დაწყებამდე მოსამართლემ სამსახურისგან მიღებული წერილი წაიკითხა.
• "დღეის მდგომარეობით პენიტენციური სამსახური მოკლებულია შესაძლებლობას, უზრუნველყოს მსჯავრდებული სააკაშვილის ჩართვა", — ნათქვამია წერილში.
• უწყების წარმომადგენელმა სხდომათა დარბაზში განაცხადა, რომ მოთხოვნის შესწავლას 1 თვე სჭირდება.
• "ამ ეტაპზე პენიტენციურ სამსახურს არ აქვს შესაბამისი ტექნიკური მოწყობილობები, სწორედ ამ მიზეზიდან გამომდინარე, ვერ მოხერხდა მსჯავრდებულის სასამართლო პროცესზე ჩართვა", — თქვა მან.

სააკაშვილის ადვოკატმა, შალვა ხაჭაპურიძემ პენიტენციურის ეს გადაწყვეტილება სხდომათა დარბაზში გააპროტესტა.

• "არის მოთავსებული კოლბაში და მის მიმართ სამართლებრივი პროცესი გაიყინა", — თქვა მან.
• ხაჭაპურიძის პოზიცია მოსამართლემაც გაიზიარა და განაცხადა, რომ "ერთი თვე წარდგენილი მასალის გაცნობას ნამდვილად არ სჭირდება".

მოგვიანებით, ადვოკატმა პროცესზე სააკაშვილის ვიდეოკადრების გამოთხოვნის შუამდგომლობა დააყენა, რაც ხაჭაპურიძემ იმით ახსნა, რომ ექსპრეზიდენტს სათანადოდ არ ეპყრობიან და ვერც შესაბამის მკურნალობას იღებს.

• "ნებისმიერი მისი გადაადგილების, საკნებში და პალატებში ყოფნის ვიდეომასალების გამოთხოვა სრულად", — თქვა ადვოკატმა.
• პენიტენციური სამსახურის წარმომადგენელმა თქვა, რომ, თუ სასამართლო ამ შუამდგომლობას დააკმაყოფილებს, ისინი სააკაშვილის უფლებადამცველებს კადრებს გადასცემენ, თუმცა, მისივე თქმით, უცნობია, შენახულია თუ არა ეს მასალები პირველი ოქტომბრიდან დღემდე.
• "თუ განადგურებულია ეგ მასალა, იუსტიციის მინისტრი რაზე ლაპარაკობდა გუშინ", — თქვა ხაჭაპურიძემ.
• ადვოკატმა, ასევე, ითხოვა, გადაეცეთ წარსულში გამოთხოვილი საჯარო ინფორმაცია, რომლებიც, ხაჭაპურიძის თქმით, საჯარო უწყებებიდან ჯერ კიდევ არ მიუღიათ.

მოსამართლემ შუამდგომლობა დააკმაყოფილა და პენიტენციურ სამსახურს დაავალა, 2022 წლის პირველი ოქტომბრიდან 14 დეკემბრის ჩათვლით, სააკაშვილთან დაკავშირებით სამსახურში დაცული მასალა ადვოკატებს გადაეცეს.

მიხეილ სააკაშვილი თბილისში 1 ოქტომბერს დააკავეს.

• 20 ოქტომბერს, პროკურატურაში გამართულ ბრიფინგზე ცნობილი გახდა, რომ სააკაშვილმა სახელმწიფო საზღვარი უკანონოდ 29 სექტემბერს, რძის პროდუქტებით დატვირთული ტრაილერით გადმოკვეთა.
• სამართალდამცავმა უწყებამ მას ბრალი სისხლის სამართლის კოდექსის 344-ე მუხლის პირველი ნაწილით წარუდგინა, რაც საქართველოს სახელმწიფო საზღვრის უკანონოდ კვეთას გულისხმობს და ჯარიმით ან 3-დან 5 წლამდე პატიმრობით ისჯება.
• უზენაესი სასამართლოს მიერ სააკაშვილი დამნაშავედ არის ცნობილი ბიზნესმენ ვალერი გელაშვილის ცემისა და სანდრო გირგვლიანის მკვლელობაში ბრალდებულ პირთა შეწყალების საქმეებზე.
• ასევე — 7 ნოემბრის აქციის დარბევისა და იმედში შეჭრის, პატარკაციშვილების ქონების უკანონოდ დაუფლებისა და სახელმწიფო დაცვის სპეციალური სამსახურის კუთვნილი 9 024 367 ლარის გაფლანგვის საქმეებზე.

არქივიდან: სააკაშვილმა დაპატიმრების შემდეგ შიმშილობა ორჯერ გამოაცხადა. პირველი, 50-დღიანი შიმშილობა მან 19 ნოემბერს, გორის სამხედრო ჰოსპიტალში გადაყვანის შემდეგ შეწყვიტა.

• მეორედ ექსპრეზიდენტმა შიმშილობა 21 თებერვალს დაიწყო, მე-20 დღეს კი შეწყვეტის მიზეზად უკრაინის მთავარსარდლობის თხოვნა დაასახელა.