უკრაინის პრეზიდენტი ევროპის ქვეყნებს სთხოვს, უკრაინას ენერგეტიკული კრიზისის დაძლევაში დაეხმარონ და 6 ძირითად საჭიროებას ასახელებს.

რატომ არის მნიშვნელოვანი: რუსეთი უკრაინის კრიტიკული ინფრასტრუქტურის ობიექტებზე, მათ შორის, ენერგიის გადამცემ ხაზებზე, ელექტროსადგურებსა და ქვესადგურებზე მასობრივ სარაკეტო თავდასხმებს აგრძელებს, რის გამოც ქვეყნის დიდი ნაწილი ელექტროენერგიის გარეშეა დარჩენილი.

  • ზელენსკის თქმით, ევროპის დახმარება არა მხოლოდ საშუალებას მისცემს უკრაინას, გაუძლოს ზამთარს, არამედ ნათლად დაუმტკიცებს ნებისმიერ ანტიდემოკრატიულ და ანტიევროპულ ძალას და პირველ რიგში, რუსეთს, რომ ევროპამ ისწავლა კატასტროფების არდაშვება და საკუთარი ხალხის დაცვა.

პირველი საჭიროება, რასაც ზელენსკი ასახელებს, ტრანსფორმატორები და მაღალი ძაბვის ქსელების აღდგენისთვის საჭირო აღჭურვილობაა.

მეორე — დახმარება ორი მილიარდი კუბური მეტრი გაზის შესაძენად.

მესამე — ევროკავშირმა გაგზავნოს სპეციალური მისიები კრიტიკული ენერგეტიკული ინფრასტრუქტურის ობიექტებში, რომლებიც მონაწილეობენ უკრაინის ენერგომომარაგებაში.

მეოთხე — დახმარება ევროპის ელექტროქსელისგან.

მეხუთე — შეთანხმება უკრაინისთვის LED ნათურების შესყიდვის პროექტის დაფინანსებაზე.

მეექვსე — სპეციალური მუდმივი მექანიზმი ძალისხმევის კოორდინაციისთვის — პარიზის მექანიზმი, რაც შესაძლებელს გახდის რუსული ენერგეტიკული ტერორის ყველა გამოწვევას ეფექტური პასუხი გაეცეს.