ქართული ლეგიონის მეთაურმა, მამუკა მამულაშვილმა პალიტრანიუსის ეთერში პრემიერმინისტრის დღევანდელ განცხადებას უპასუხა.

რატომ არის მნიშვნელოვანი: დღეს ჟურნალისტებთან საუბრისას პრემიერმინისტრი ამტკიცებდა, რომ მედიამ არასწორი ინტერპრეტაციით გაავრცელა მისი ნათქვამი უკრაინაში მებრძოლ ქართველებზე და მას არ უგულისხმია, რომ ყველა ვინც იქ იბრძვის, ოპოზიციასთან არის დაკავშირებული.

  • თუმცა ღარიბაშვილმა თქვა ისიც, რომ არიან კონკრეტული პირები, მათ შორის, ქართული ლეგიონის ხელმძღვანელი, რომელიც ენმ-ის ყოფილი დეპუტატის, ნონა მამულაშვილის ძმაა.
  • მან ხაზი გაუსვა, რომ მამუკა მამულაშვილი საერთაშორისო კონფერენციებში ერთვება და პოლიტიკურ განცხადებებს აკეთებს.
  • "მინდა მივმართო ამ ადამიანს, მამულაშვილს და მისნაირებს, პოლიტიკურად ანგაჟირებულებს, ღმერთმა მოგცეს საშუალება, იომე, მაგრამ ეს პარტიული ჩართვები და მითუმეტეს რამდენიმე ადამიანის პოლიტიკური განცხადებები მოვისმინე თქვენს ტელევიზიებზე, პოლიტიკური განცხადებების კეთება ომის ფრონტიდან მე არ ვიცი რა არის", — თქვა ღარიბაშვილმა.

დეტალები: მამულაშვილმა კი უპასუხა, რომ მისი გადასაწყვეტი არ არის პოლიტიკურ განცხადებას გააკეთებს თუ არა.

  • "მე მესმის, რომ რუსულ ყაიდაზეა გაზრდილი და მისთვის შეზღუდულია სხვადასხვა სფეროში სხვადასხვა ადამიანის ლაპარაკი, ამაზე არ არის ლაპარაკი. მე მგონია, რომ ცოტა პატივისცემით უნდა მოეპყროს იმ საკითხს, რასაც დღეს ქართული ლეგიონი აკეთებს. ეს არის საქართველოს ინტერესების დაცვა და მეგობრობის გამყარება", — თქვა მან პრემიერმინისტრზე.
  • მამულაშვილმა აღნიშნა ისიც, რომ ქართული ოცნების პოლიტიკური გუნდი მისთვის არ არის მისაღები და მოუწოდა, დაიცვან საქართველოს ინტერესები და არ გაატარონ რუსული პოლიტიკა ქვეყანაში.
  • "არ ვიცი, რა კომენტარის გაკეთება შეიძლება, როდესაც ადამიანმა არ იცის, რაზე ლაპარაკობს, ეს ერთი. მერე რაც შეეხება კონფერენციას ევროპარლამენტში, არაერთხელ ვყოფილვარ მიწვეული და მილაპარაკია და მგონი, ეს ღარიბაშვილის კომპეტენცია არ უნდა იყოს საერთოდ", — განაცხადა მან.

გარდა ამისა, ნონა მამულაშვილმა დაპოსტა, რომ მის ძმას არაფერი აკავშირებს არც ნაციონალურ მოძრაობასთან და არც სხვა რომელიმე პარტიასთან და პატრიოტია, რომელიც ჩვენი ქვეყნის მტრის წინააღმდეგ 14 წლიდან იბრძვის.

  • "რაც შეეხება ღარიბაშვილს, ის ამ ქვეყნის, მისი ხალხის და მისი ისტორიის სირცხვილია, რის კომპენსირებასაც სწორედ ჩემი ძმა და მისი მსგავსი ათასობით ღირსეული ქართველი ახერხებს უკრაინაში", — წერს ის.