საბავშვო მულტფილმი, რომელიც დათვსა და პატარა გოგოზე მოგვითხრობს, ერთი შეხედვით, საპარლამენტო შეშფოთების საკითხს არ ჰგავს.

მიუხედავად ამისა, დიდი ბრიტანეთის მრავალპარტიულმა დეპუტატთა ჯგუფმა მთავრობას მოუწოდა, გაერთიანებულ სამეფოში მულტფილმ მაშა და დათვის აკრძალვა განიხილონ, რადგან მიაჩნიათ, რომ ის რუსული პროპაგანდის ფორმას წარმოადგენს.

მულტფილმი, რომელიც ნაწილობრივ რუსულ ხალხურ ზღაპარს ეფუძნება, YouTube-ის ისტორიაში ერთ-ერთი ყველაზე პოპულარული შოუა. მის ერთ-ერთ 7-წუთიან ეპიზოდს პლატფორმაზე 4.6 მილიარდზე მეტი ნახვა აქვს.

თუმცა, უკრაინის სახელმწიფო უწყებამ და ესტონეთის საგარეო საქმეთა მინისტრმა შოუ რუსული რბილი ძალის ინსტრუმენტად შეაფასეს.

მას შემდეგ, რაც ცნობილი გახდა, რომ Netflix-მა სერიალის ახალი სეზონი შეუკვეთა, ხოლო თავად მულტფილმი ბრიტანული ტელეკომპანია ITV-ის ციფრულ პლატფორმაზე (ITVX) გახდა ხელმისაწვდომი, დიდი ბრიტანეთის დეპუტატებმა კულტურის მინისტრ ლიზა ნენდის წერილი მისწერეს. წერილი ამტკიცებს, რომ 4 წლის მაშას ზოგიერთი ოინი პროპაგანდისტულ შინაარსს ატარებს.

დეპუტატები ორ კონკრეტულ ეპიზოდზე ამახვილებენ ყურადღებას: ერთ-ერთ სერიაში მაშას ტანკისტის ქუდი და საბჭოთა ეპოქის სამხედრო ფორმა აცვია; მეორე ეპიზოდში მას საბჭოთა მესაზღვრის ქუდი ახურავს, რაც ისტორიულად შინაგან საქმეთა სახალხო კომისარიატთან — საბჭოთა კავშირის საიდუმლო პოლიციასთან — ასოცირდება. ეს უწყება პასუხისმგებელი იყო მასობრივ დეპორტაციებზე, სიკვდილით დასჯასა და ათეულობით მილიონი ადამიანის დევნაზე.

პარლამენტარების განცხადებით, ეს არის საბჭოთა სამხედრო სიმბოლიკის ნორმალიზება მცირეწლოვანი ბავშვების აუდიტორიისთვის.

მათ ასევე მოიშველიეს უკრაინის დეზინფორმაციასთან ბრძოლის ცენტრის კომენტარები, სადაც აღნიშნულია, რომ მაშა და დათვი მხოლოდ მულტფილმი კი არა, რუსული რბილი ძალის ინსტრუმენტია. ცენტრის განცხადებით, მულტფილმში მაშას საშუალებით სხვა ხალხების ტრადიციების დაცინვა, საბჭოთა სიმბოლოებისა და მილიტარისტული თემების ნორმალიზება ხდება.

მულტფილმის მწარმოებელი კომპანია Animaccord ამ ბრალდებებს კატეგორიულად უარყოფს და აცხადებს, რომ ისინი კერძო ბიზნესს წარმოადგენენ, რომელიც უბრალოდ პოპულარულ საბავშვო შოუს ქმნის. კომპანიაში აღნიშნავენ, რომ მათ არასდროს მიუღიათ სახელმწიფო დაფინანსება.

მიუხედავად ამისა, ბრიტანელი დეპუტატების წუხილს სხვა ქვეყნების მთავრობებიც იზიარებენ. ესტონეთის საგარეო საქმეთა მინისტრმა მარგუს ცაჰკნამ განაცხადა:

"მაშა და დათვი კრემლის რბილი ძალის ნაწილია, რომელიც საბავშვო ინდუსტრიაში კრემლისტურ და მილიტარისტულ ნარატივებს ნერგავს. მრავალი ქვეყნისთვის, მათ შორის ესტონეთისთვის, საბჭოთა სიმბოლოები ოკუპაციას, მასობრივ მკვლელობებს, დეპორტაციებსა და კაცობრიობის წინააღმდეგ ჩადენილ დანაშაულებს განასახიერებს".