ამის შესახებ ინფორმაციას პროკურატურა ავრცელებს.

რატომ არის მნიშვნელოვანი: პროკურატურის ცნობით, ადიგენის მუნიციპალიტეტის სოფელ დერცელის საჯარო სკოლის ყოფილმა ბუღალტერმა 2019-2021 წლებში, სამსახურებრივი მდგომარეობის გამოყენებით, სკოლის საბანკო ანგარიშიდან საკუთარ ანგარიშზე გადარიცხა 142 629 ლარი, რაც აზარტულ თამაშებზე, სხვადასხვა კომერციულ და გასართობ ობიექტებში გამოიყენა.

  • ამავე საჯარო სკოლის დირექტორმა კი სათანადო კონტროლი არ გაუწია სკოლის კუთვნილი თანხების მიზნობრივ ხარჯვას.

დეტალები: უწყების ცნობით, ახალციხის რაიონულმა სასამართლომ ბუღალტერი დამნაშავედ ცნო და სასჯელის სახედ და ზომად 8 წლით თავისუფლების აღკვეთა მიუსაჯა, საიდანაც 6 წელი განესაზღვრა სასჯელაღსრულების დაწესებულებაში მოსახდელად, ხოლო 2 წელი ჩაეთვალა პირობითად 4 წლის გამოსაცდელი ვადით.

  • ამავე სკოლის დირექტორი სასამართლომ დამნაშავედ ცნო სისხლის სამართლის კოდექსის 342-ე მუხლის პირველი ნაწილით (სამსახურებრივი გულგრილობა) და 1 წლით თავისუფლების აღკვეთა მიუსაჯა, რაც ჩაეთვალა პირობითად 2 წლის გამოსაცდელი ვადით.