უმრავლესობის წევრი, მანანა კობახიძე რუსთავი 2-ის საქმის მოსამართლის, ნათია გუჯაბიძის შესაძლო თაღლითობაში ჩართულობასა და მის მიერ საკუთარი დედისგან ბინის ქირაობასთან დაკავშირებით განმარტავს, რომ აღნიშნული მხოლოდ შეიძლება შეფასდეს, როგორც დედა-შვილობის პრობლემა და ის არ შეიძლება გახდეს დისციპლინური დევნის საფუძველი:

"სისხლის სამართლის დანაშაულს და თაღლითობას ნამდვილად არ აქვს ადგილი. ამ ხელშეკრულების დადებას შეიძლება ერთი მორალური მხარე ჰქონდეს, შეიძლება დედა-შვილობის რაღაც პრობლემად განიხილო, მაგრამ სამართლებრივად ამ ხელშეკრულების დადებას არავითარი კანონის მიღმა ფარგლები არ აქვს. არც დისციპლინური დევნის საფუძველია და მითუმეტეს, არც მოსამართლის აცილების. ყოველ შემთხვევაში, ესეც სასამართლოს მიერ არის შესაფასებელი".

ვიცეპრემიერი, კახა კალაძე კი ამბობს, რომ ნიკა გვარამიას მიერ გავრცელებული ინფორმაცია შესაძლოა ისეთივე ტყუილი აღმოჩნდეს, როგორიც ზოგადად რუსთავი 2-ის მიერ გადაიცემა:

"მე არანაირი ინფორმაცია არ მაქვს ამასთან დაკავშირებით. ეს შეიძლება იყოს ძალიან დიდი სიცრუე, როგორც ხდება ხოლმე რუსთავი 2-ს ეთერიდან სიცრუის პროპაგანდა. ეს არ არის რაღაც სიახლე, ეს წლების განმავლობაში ასე ხდებოდა და სამწუხაროდ, დღესაც ასე ხდება. რაც შეეხება პროცესს, რომელიც მიდის რუსთავი 2-თან დაკავშირებით, ჩვენ უნდა დაველოდოთ. წინასწარ რაიმე კომენტარების გაკეთება, მგონია, რომ არასწორი იქნებოდა".

1 ივნისს რუსთავი 2-ისგენერალურმა დირექტორმა, ნიკა გვარამიამ განაცხადა, რომ ამავე ტელეკომპანიის საქმის მოსამართლე, ნათია გუჯაბიძე "თაღლითობაშია შემჩნეული", რადგან სახელმწიფოს თანხებით ბინას თავისივე დედისგან ქირაობდა.